ഇടതുപക്ഷ ഐക്യം ലക്ഷ്യമിട്ട്‌ പികെ വാസുദേവന്‍ നായര്‍ പടിയിറങ്ങിയപ്പോള്‍ മുഖ്യമന്ത്രി പദത്തിലേക്ക്‌ എത്തിയത്‌ ലീഗ്‌ നേതാവ്‌ സി എച്ച് മുഹമ്മദ് കോയ ആയിരുന്നു. കരുണാകരന്റെ പിന്തുണയോടെ കേരളാകോണ്‍ഗ്രസിനെയും പ്രജാസോഷ്യലിസ്‌റ്റ്‌ പാര്‍ട്ടിയെയും കൂടെകൂട്ടിയായിരുന്നു സി എച്ച് ഭരണം തുടങ്ങിയത്‌. ലീഗിന്റെ ഒരേഒരു മുഖ്യമന്ത്രിയാണ്‌ ചെറിയാന്‍കണ്ടി മുഹമ്മദ് കോയ. ഒരുമാസവും ഇരുപത്‌ ദിവസവും മാത്രം നീണ്ടുനിന്ന കോയ മന്ത്രിസഭ 1979 ഡിസംബര്‍ ഒന്നിന്‌ കൂപ്പുകുത്തി. സഖ്യകക്ഷികളായ മാണിയും ജോസഫും പിന്തുണ പിന്‍വലിച്ചതോടെ സിഎച്ചിന്‌ പടിയിറങ്ങേണ്ടിവന്നു
വിദ്യാഭ്യാസ രംഗത്ത്‌ നിരവധി പരിഷ്‌കാരങ്ങള്‍ കൊണ്ടുവന്ന നേതാവ്‌ കൂടിയാണ്‌ സിഎച്ച്‌. മുസ്ലീം പെണ്‍കുട്ടികള്‍ക്ക്‌ സ്‌കോളര്‍ഷിപ്പ്‌ ഏര്‍പ്പെടുത്തി. അറബി ഭാഷ പഠനവിഷയമാക്കി. ഒപ്പം ഒട്ടനവധി പുരോഗമന നയങ്ങള്‍ക്കും കുറഞ്ഞകാലം കൊണ്ട്‌ തുടക്കമിട്ടു. കാലിക്കറ്റ്‌ സര്‍വ്വകലാശാലയ്‌ക്കുവേണ്ടി അഹോരാത്രം പ്രയത്‌നിച്ചു. കേരളത്തിലെ രണ്ടാമത്തെ ഉപമുഖ്യമന്ത്രിയും സ്‌പീക്കറായും സിഎച്ച്‌ പ്രവര്‍ത്തിച്ചു.
എഴുത്തുകാരനും മാധ്യമപ്രവര്‍ത്തകനും വാഗ്മിയുമായിരുന്നു സിഎച്ച്‌ മുഹമ്മദ്‌കോയ. ഉപമുഖ്യമന്ത്രി പദത്തിലിരിക്കെയാണ്‌ 1983ല്‍ അദ്ദേഹം വിടവാങ്ങിയത്‌.
