രാഷ്ട്രീയമാണ്, തെരഞ്ഞെടുപ്പാണ്, വോട്ടാണ് പ്രധാനം. എല്ലാം ശരിയാണ്. പക്ഷേ ഇത്രയും വലിയൊരു ഗതികേട് മറ്റൊരു പാർട്ടിക്കുണ്ടോ എന്ന് സംശയമാണ്. ഇന്ത്യയിലെ ഏറ്റവും വലിയ തൊഴിലാളി വർഗ്ഗ വിപ്ലവ പാർട്ടിയെന്ന് അവകാശപ്പെടുന്ന സിപിഎമ്മിന്റെ ജനറൽ സെക്രട്ടറി സീതാറാം യെച്ചൂരിയെപ്പോലെ ഗതികേട് അനുഭവിക്കുന്ന മറ്റൊരു പാർട്ടി നേതാവുണ്ടോ എന്നതും സംശയമാണ്. വാളയാറിന് അപ്പുറം രാഹുൽ കീ ജയ് എന്നും ഇപ്പുറം രാഹുലിന്റെ പാർട്ടിക്ക് വോട്ടു കൊടുക്കരുത് എന്നും പറയേണ്ടി വരുന്ന ഒരു പ്രത്യേക മാനസികാവസ്ഥയിലാണ് അദ്ദേഹമുള്ളത്.
മൂന്ന് പതിറ്റാണ്ട് ഭരിച്ചതിനു ശേഷം ജനങ്ങൾ തൂക്കിയെറിഞ്ഞതോടെ പാർട്ടി ഓഫീസുകൾ വരെ നഷ്ടമായിക്കൊണ്ടിരിക്കുന്ന അവസ്ഥയാണ് ഇപ്പോൾ ബംഗാളിലുള്ളത്. തൃണമൂൽ കോൺഗ്രസിനെ എതിരിടണമെങ്കിൽ കായികമായി ബിജെപിക്കൊപ്പവും രാഷ്ട്രീയമായി കോൺഗ്രസ് സഖ്യത്തിലാണിപ്പോൾ സിപിഎം. തെരഞ്ഞെടുപ്പ് പ്രചാരണാർത്ഥം ബംഗാളിലെത്തുന്ന യെച്ചൂരി കൈ മെയ് മറന്ന് കോൺഗ്രസിനൊപ്പം ചേർന്ന് പ്രവർത്തിക്കുകയാണ്.
ബംഗാളിൽ നിന്ന് തമിഴ്നാട്ടിലെത്തിയാലും സ്ഥിതി വിഭിന്നമല്ല. ഡി.എം.കെ – കോൺഗ്രസ് മുന്നണിയിലാണ് സിപിഎം. അൻപുള്ള തമിഴ് മക്കളോട് കോൺഗ്രസിനു കൂടി ആത്മാർത്ഥമായി വോട്ട് ചോദിക്കുകയാണ് യെച്ചൂരി. രാഹുൽ കീ ജയ്, സോണിയ ഗാന്ധി കീ ജയ് എന്ന മുദ്രാവാക്യങ്ങൾ ഏറ്റു വിളിക്കുകയും വേണം. ഇതെല്ലാം കഴിഞ്ഞ് വാളയാർ അതിർത്തി കടന്ന് കേരളത്തിലെത്തിയാൽ സ്ഥിതി മാറി. ഇവിടെ രാഹുലിന്റെ പാർട്ടിയെ എതിർക്കലാണ് ജോലി. കോൺഗ്രസ് – ബിജെപി സഖ്യമുണ്ടെന്ന ആരോപണവും ഉന്നയിക്കണം. അബദ്ധം പറ്റിയെങ്ങാനും തമിഴ്നാട്ടിലെ രാഹുൽ കീ ജയ് വിളി ഇവിടെ ആവർത്തിച്ചാൽ മാനവും പോകും.
കയ്യിലിരിപ്പാണോ ഭരണത്തിന്റെ ഗുണമാണോ എന്നറിയില്ല. ഭരണത്തിലുണ്ടായിരുന്ന ബംഗാളും ത്രിപുരയും ഇനിയൊരിക്കലും കിട്ടാത്ത വിധത്തിൽ കൈ വിട്ടു പോയിക്കഴിഞ്ഞു. ഇനിയാകെ ഉള്ളത് കേരളമാണ്. അവിടെയാകട്ടെ സ്വർണക്കടത്തും ഡോളർകടത്തും മറ്റഴിമതികളും എല്ലാം വന്ന് ആകെ കുരുക്കിലാണ്. എത്രയൊക്കെ തടയാൻ നോക്കിയിട്ടും ബിജെപി നിർണായക ശക്തിയായി വളർന്നു വരുന്നുമുണ്ട്. ഭാവിയിൽ കേരളത്തിലും ഫാസിസ്റ്റുകൾക്കെതിരെ കോൺഗ്രസുമായി സഖ്യമുണ്ടാക്കി മത്സരിക്കേണ്ടി വരുമോ എന്ന ആശങ്ക കലശലായുണ്ട് താനും.
കേരളത്തിലെ നേതാക്കൾ എന്തായാലും സേഫ് സോണിലാണ്. പിണറായി വിജയനോ കൊടിയേരി ബാലകൃഷ്ണനോ എ വിജയരാഘവനോ തോമസ് ഐസക്കിനോ വേറെയെങ്ങും പ്രചാരണത്തിനു പോകേണ്ട കാര്യമില്ല. അതുകൊണ്ട് തന്നെ ഗതികേടുമില്ല. ഇവിടെ കോൺഗ്രസിനെ കുറ്റം പറഞ്ഞ് കാലം കഴിക്കാം. മറ്റ് സംസ്ഥാനങ്ങളിൽ കോൺഗ്രസിനൊപ്പമുള്ള സഖ്യത്തെ പറ്റി ഇവിടെ മിണ്ടാതിരിക്കാം. പ്രബുദ്ധ ജനത കേട്ടുകൊള്ളും. കാരണം ഇത് കേരളമാണ് !
