പൂക്കള്‍ തീര്‍ക്കുന്ന വസന്തം എന്നും മനസ്സിന് ഏറെ കുളിര്‍മ്മയേകുന്ന ഒരു കാഴ്ചയാണ്. ആരും കാണാന്‍ കൊതിക്കുന്ന അത്തരത്തില്‍ ഒരു കാഴ്ച സബര്‍വാന്‍ മലയോരത്താണ് , ദാല്‍ തടാകം തൊട്ടു നില്‍ക്കുന്ന അതിമനോഹരമായ ട്യൂലിപ് വസന്തം . ഏപ്രില്‍ മൂന്നിനാണ് ട്യൂലിപ് ഫെസ്റ്റിവല്‍ ആരംഭിച്ചത് .
ഏഷ്യയിലെ തന്നെ ഏറ്റവും വലിയ ഈ ട്യൂലിപ് പൂന്തോട്ടത്തില്‍ നിറത്തിലും ഇനത്തിലും ഭംഗിയിലും വേറിട്ട വിസ്മയം തീര്‍ക്കുന്ന അനവധി പൂക്കളാണ് വിരിഞ്ഞു നില്‍ക്കുന്നത്. ട്യൂലിപ് മാത്രമല്ല, ഡാഫഡിലും റോസും ഉള്‍പ്പെടെ വസന്തത്തിന്റെ വരവ് അറിയിച്ചു കൊണ്ടുളള പൂക്കളെല്ലാം തന്നെ എണ്‍പത് ഏക്കറില്‍ പരന്നു കിടക്കുന്ന ഈ തോട്ടത്തില്‍ ഉണ്ട്. സീസണില്‍ അഞ്ച് ലക്ഷം സന്ദര്‍ശകര്‍ വരെ ഈ പൂവസന്തം ആസ്വദിക്കാനായി എത്തുന്നത് പതിവാണ്. എന്നാല്‍ കഴിഞ്ഞ വര്‍ഷം ഈ പൂ വസന്തം ആരും ആസ്വദിക്കാന്‍ ഇല്ലാതെ കടന്നു പോയിരുന്നു.
2007 ല്‍ അന്നത്തെ ജമ്മു കശ്മീര്‍ മുഖ്യമന്തി ഗുലാം നബി ആസാദ് മുന്‍കൈ എടുത്താണ് ഈ പൂന്തോട്ടം തുറന്നത്. അന്നു മുതല്‍ വിനോദ സഞ്ചാരികളുടെ പ്രിയ കേന്ദ്രമാണിത്. ഇപ്പോള്‍ സഞ്ചാരികളെ വരവേല്‍ക്കാന്‍ ഒരുങ്ങി നില്‍ക്കുകയാണ് ഈ വസന്തം.
