പാമ്പുകളെ പിടികൂടുന്നതും അതിന്റെ ദൃശ്യങ്ങളുമെല്ലാം നിരവധി കണ്ടു കഴിഞ്ഞവയാണ്. അതില് നിന്നെല്ലാം ഏറെ കൗതുകം നിറഞ്ഞ കാഴ്ചയാണ് ഇപ്പോള് സോഷ്യല് മീഡിയയില് വൈറലാകുന്നത്. ദാഹിച്ചു വലഞ്ഞ രാജവെമ്പാലയ്ക്ക് കുപ്പിയില് നിന്നു വെള്ളം നല്കുന്ന രക്ഷാപ്രവര്ത്തകരുടെ ദൃശ്യമാണ് കൗതുകമാകുന്നത്. പാമ്പുപിടിത്ത വിദഗ്ധര് ഉള്പ്പെട്ട സംഘമാണ് വെള്ളം നല്കിയത്.
തായ്ലന്ഡില് നിന്നുള്ളതാണ് ദൃശ്യമാണിത്. വീടിനുള്ളില് പതുങ്ങിയിരുന്ന രാജവെമ്പാലയെ പിടികൂടാനായി എത്തിയതായിരുന്നു പാമ്പുപിടിത്ത വിദഗ്ധര് ഉള്പ്പെടുന്ന സംഘം. വീടിനുള്ളില് നിന്നും പിടികൂടിയ രാജവെമ്പാലയെ ഒരു ബോക്സിനുള്ളിലാണ് സൂക്ഷിച്ചിരുന്നത്. ബോക്സിനുള്ളില് അടച്ച രാജവെമ്പാല കടുത്ത ചൂടേറ്റ് അവശനിലയിലായിരുന്നു.
പിടികൂടിയ രാജവെമ്പാലയെ വനത്തിനുള്ളില് തുറന്നു വിടുന്നതിനു മുന്പായി അതിന്റെ ശരീരം തണുപ്പിക്കാനും ദാഹമകറ്റാനുമാണ് കുപ്പിയിലുണ്ടായിരുന്ന വെള്ളം നല്കിയതെന്ന് രക്ഷാപ്രവര്ത്തകര് വ്യക്തമാക്കി. കഴിഞ്ഞ കുറച്ചു ദിവസങ്ങളായി കടുത്ത ചൂടിന്റെ പിടിയിലാണ് തായ്ലന്ഡിലെ മിക്ക പ്രദേശങ്ങളും. ഇതാകാം പാമ്പുകള് ഉള്പ്പെടെയുള്ള ജീവികള് തണുപ്പു തേടി ജനവാസ കേന്ദ്രങ്ങളിലേക്കിറങ്ങാന് കാരണമെന്നാണ് നിഗമനം.
