ദോഹ: ഇന്ത്യ ഉള്പ്പെടെ ആറു രാജ്യങ്ങളില് നിന്നു ഖത്തറിലേക്ക് എത്തുന്നവരുടെ ക്വാറന്റൈന് പ്രോട്ടോ്കോള് പുതുക്കിയ സാഹചര്യത്തില് നിലവില് ഹോട്ടല് ബുക്ക് ചെയ്തിരുന്നവര് റീബുക്കിങ് നടത്തണം. ക്വാറന്റൈന് ഹോട്ടല് ബുക്കിങ്ങിന്റെ ചുമതലയുള്ള ഡിസ്കവര് ഖത്തറാണ് ഇതു സംബന്ധിച്ച പുതിയ മാര്ഗനിര്ദേശങ്ങള് പുറപ്പെടുവിച്ചത്. ഇന്ത്യക്കു പുറമേ പാക്കിസ്ഥാന്, ബംഗ്ലാദേശ്, നേപ്പാള്, ശ്രീലങ്ക, ഫിലിപ്പീന്സ് എന്നീ ആറു രാജ്യക്കാരുടെ ക്വാറന്റൈനു മാത്രമായി പ്രത്യേക ഹോട്ടലുകള് സജ്ജമാക്കിയിട്ടുണ്ട്. ഈ ഹോട്ടലുകളില് മാത്രമേ ഇനി ഈ ആറു രാജ്യക്കാര്ക്കും ബുക്കിങ് ലഭിക്കൂ. ബുക്കിങ്ങിനുള്ള പ്രത്യേക ലിങ്ക് ഡിസ്കവര് ഖത്തര് വെബ്സൈറ്റില് ലഭ്യമാണ്.
ഇന്ന് അര്ദ്ധരാത്രിക്കു ശേഷം യാത്ര പുറപ്പെടേണ്ടവര് മുന്കൂറായി ഹോട്ടല് ബുക്ക് ചെയ്തിട്ടുണ്ടെങ്കില് അതു റദ്ദാക്കിയ അറിയിപ്പ് ഇ-മെയിലില് ലഭിക്കും. പുതിയ ഹോട്ടല് ബുക്ക് ചെയ്യേണ്ടതെങ്ങനെയെന്ന വിശദാംശവും ഈ ഇ-മെയിലില് ഉണ്ടാവും. അതനുസരിച്ചുള്ള തുക പൂര്ണമായി അടച്ച് പുതിയ ഹോട്ടല് ബുക്ക് ചെയ്യണം. ആദ്യ ഹോട്ടല് ബുക്കിങ്ങിന് അടച്ച തുക 15 ദിവസത്തിനുള്ളില് മടക്കി ലഭിക്കും.
ഇന്ത്യ ഉള്പ്പെടെ ആറു രാജ്യങ്ങളില് നിന്നുള്ള യാത്രക്കാര് നിശ്ചിത ഹോട്ടലുകളിലെ ബുക്കിങ് വൗച്ചര് ഹാജരാക്കിയാലേ വിമാനത്തില് പ്രവേശിപ്പിക്കൂ. ഇതിനു പുറമേ സര്ക്കാര് അംഗീകൃത ലാബില് നിന്നു 48 മണിക്കൂറിനുള്ളില് ലഭിച്ച കോവിഡ് നെഗറ്റിവ് സര്ട്ടിഫിക്കറ്റും ഹാജരാക്കണം.
നിശ്ചിത ഹോട്ടലുകളിലല്ലാതെ മറ്റേതെങ്കിലും ഹോട്ടലിലാണ് ബുക്കിങ്ങെങ്കില് യാത്ര മുടങ്ങുമെന്നു മാത്രമല്ല, ബുക്കിങ്ങിനായി അടച്ച പണം തിരികെ ലഭിക്കുകയുമില്ല.
Comments