വാഷിംഗ്ടൺ: ശരീരത്തിൽ തേനീച്ചകളുമായുള്ള ഹോളിവുഡ് താരം ആഞ്ജലീന ജോളിയുടെ ഫോട്ടോഷൂട്ട് ശ്രദ്ധനേടുന്നു. ലോക തേനീച്ച ദിനത്തിന്റെ ഭാഗമായി നാഷനൽ ജിയോഗ്രഫിയ്ക്ക് വേണ്ടിയായിരുന്നു താരത്തിന്റെ വ്യത്യസ്ത ഫോട്ടോഷൂട്ട്. ഇതിന്റെ വീഡിയോയും ആഞ്ജലീന ജോലി പങ്കുവെച്ചിട്ടുണ്ട്. ഏകദേശം 18 മിനിറ്റോളമാണു താരം തേനീച്ചകളെ ശരീരത്തിൽ ഇരുത്തിയത്.
ആഞ്ജലീന ഒഴികെ മറ്റെല്ലാവരും സുരക്ഷയ്ക്കു വേണ്ട സ്യൂട്ട് ധരിച്ചിരുന്നു. ഡാൻ വിന്റേഴ്സ് ആണു ചിത്രങ്ങൾ പകർത്തിയത്. ഇറ്റാലിയൻ തേനീച്ചകളെയാണ് ഫോട്ടോ ഷൂട്ടിനായി ഉപയോഗിച്ചത്. ആഞ്ചലീനയുടെ ശരീരത്തിൽ ഫിറോമോൺ പുരട്ടിയാണ് തേനീച്ചകളെ ആകർഷിച്ചത്. ആഞ്ജലീനയ്ക്ക് തേനീച്ചയുടെ കുത്ത് ഏൽക്കാതിരിക്കാൻ കൃത്യമായ ശ്രദ്ധയോടെയാണ് ഫോട്ടോഷൂട്ട് നടത്തിയതെന്ന് ഡാൻ വ്യക്തമാക്കുന്നു.
തേനീച്ചകളുടെ സംരക്ഷണത്തിനുവേണ്ടി യുനെസ്കോ തയ്യാറാക്കിയ പദ്ധതിയുടെ ഭാഗമായാണ് നാഷണൽ ജിയോഗ്രഫിയും ആഞ്ജലീന ജോളിയും ഫോട്ടോഷൂട്ടിനായി സഹകരിച്ചത്. 2025ഓടെ 125 ദശലക്ഷത്തോളം തേനീച്ചകളുടെ കുറവ് നികത്താനാണ് യുനെസ്കോയുടെ പദ്ധതി ലക്ഷ്യമിടുന്നത്. ഇതിനായി 2500ഓളം കൂടുകൾ തയ്യാറാക്കി തേനീച്ചകളെ വളർത്തുമെന്നും യുനെസ്കൊ അറിയിച്ചു.
