പോർട്ടോ: ചാമ്പ്യൻസ് ലീഗ് കിരീടത്തിൽ മുത്തമിട്ട് ചെൽസി. കന്നി കിരീടം ലക്ഷ്യമിട്ടിറങ്ങിയ മാഞ്ചസ്റ്റർ സിറ്റിയെ എതിരില്ലാത്ത ഒരു ഗോളിന് തകർത്താണ് ചെൽസി കിരീടം സ്വന്തമാക്കിയത്. മൂന്നാം ഫൈനലിനിറങ്ങിയ ചെല്‍സിയുടെ രണ്ടാം ചാമ്പ്യന്‍സ് ലീഗ് കിരീടമാണ് ഇത്. നേരത്തെ രണ്ടുവട്ടം ഫൈനല്‍ കളിച്ച ചെല്‍സി 2008 ൽ തോൽവി ഏറ്റുവാങ്ങിയെങ്കിലും 2012-ല്‍ ജേതാക്കളായി.
43-ാം മിനിറ്റില്‍ കായ് ഹാവെര്‍ട്‌സാണ് ചെല്‍സിയുടെ വിജയ ഗോള്‍ നേടിയത്. മാസണ്‍ മൗണ്ടിന്റെ ത്രൂ പാസില്‍ നിന്നായിരുന്നു കായ് ഹാവെര്‍ട്‌സിന്റെ ഗോള്‍. പന്ത് സ്വീകരിച്ച ഹാവെര്‍ട്‌സ് സിറ്റി ഗോള്‍കീപ്പറുടെ പ്രതിരോധം മറികടന്ന് പന്ത് വലയിലെത്തിക്കുകയായിരുന്നു. ചാമ്പ്യന്‍സ് ലീഗില്‍ താരത്തിന്റെ ആദ്യ ഗോളാണിത്.
