മാഡ്രിഡ്: യൂറോ കപ്പിൽ നിന്ന് പുറത്തായെങ്കിലും സ്വിറ്റ്സർലന്റ് സമ്മാനിച്ചത് ആവേശകരമായ ഓർമ്മകൾ. സ്വിസ് ഗോളി യാൻ സോമറാണ് പ്രീക്വാർട്ടറിലും ക്വാർട്ടറിലും എതിരാളികളെ പ്രതിരോധിച്ചത്. പ്രീക്വാർട്ടറിൽ ലോകചാമ്പ്യന്മാരായ ഫ്രാൻസിനെ പെനാൽറ്റി ഷൂട്ടൗട്ടിൽ അട്ടിമറിച്ചതിന് കാരണക്കാരൻ സോമർമാത്രം. കിലിയൻ എംബാപ്പേയുടെ ഷോട്ട് തടുത്ത യാൻ സോമറിന്റെ കരുത്താണ് ഫ്രാൻസിനെ പുറത്താക്കിയത്.
ക്വാർട്ടറിലും തന്റെ പ്രതിഭ പുറത്തെടുത്ത സോമറിന് പക്ഷെ പെനാൽറ്റി ഷൂട്ടൗട്ടിൽ അതേ പ്രകടനം നടത്താനായില്ല. എന്നാൽ നിശ്ചിത സമയത്തെ സ്പെയിനിന്റെ ഗോൾ മുഖത്തെ മുന്നേറ്റങ്ങളെല്ലാം സോമറെന്ന കരുത്തന് മുന്നിൽ നിഷ്പ്രഭമായി.
പത്തു ഷോട്ടുകളാണ് സോമറിന്റെ കരുത്തിൽ വലയിൽ വീഴാതെ പോയത്. ശക്തമായ ഷോട്ടുകളെല്ലാം ഒറ്റയ്ക്ക് തന്നെ സോമർ രക്ഷപെടുത്തിയത് സ്പാനിഷ് പോരാളികളെ വിഷമിപ്പിച്ചു. പോസ്റ്റിന് തൊട്ടുമുന്നിലെ ഷോട്ടുകൾ പോലും തികഞ്ഞ മനസാന്നിദ്ധ്യത്തോടെ സ്വിസ് ഗോളി സോമർ തടുക്കുന്ന കാഴ്ച ആരാധകരെ ആവേശത്തിലാക്കി.
