തിരുവനന്തപുരം: ഷോ കാണിക്കരുത്, പൊളിച്ചടുക്കും നിന്നെ ഞാൻ, കൊറോണ നിയന്ത്രണം പരിശോധിക്കാനെത്തിയ എസ്ഐയോട് സിഐടിയു ഏരിയ സെക്രട്ടറിയുടെ വാക്കുകളാണിത്. തിരുവനന്തപുരം വിതുരയിലായിരുന്നു സംഭവം. സിപിഎം വിതുര ഏരിയ കമ്മറ്റി അംഗവും, സിഐടിയു വിതുര ഏരിയ സെക്രട്ടറിയുമായ എസ്. സഞ്ജയനാണ് പോലീസിനെ ഭീഷണിപ്പെടുത്തിയത്.
കൊറോണ നിയന്ത്രണങ്ങൾ ലംഘിച്ച് ഓട്ടോറിക്ഷ പാർക്ക് ചെയ്യരുതെന്ന് ആവശ്യപ്പെട്ടതോടെയാണ് പോലീസിന് നേരെ സഞ്ജയൻ തട്ടിക്കയറുകയും ഭീഷണിപ്പെടുത്തുകയും ചെയ്തത്. ഡി കാറ്റഗറിയിലാണ് പ്രദേശമെന്ന് പോലീസുകാർ ചൂണ്ടിക്കാണിച്ചെങ്കിലും സി കാറ്റഗറിയാണെന്ന് പറഞ്ഞ് സഞ്ജയൻ തർക്കം തുടർന്നു. വാക്കുകൾ ഭീഷണിയുടെ സ്വരത്തിലേക്ക് മാറിയതോടെ മോശം സംസാരം വേണ്ടെന്നും ഇത്രയും നേരം ന്യായമായിട്ടാണ് താൻ സംസാരിച്ചതെന്നും എസ്ഐ പറഞ്ഞെങ്കിലും ഇനിയും സംസാരിക്കും നീയാര്? സംസാരിച്ചാൽ എന്ത് ചെയ്യുമെന്നുമായിരുന്നു സഞ്ജയന്റെ മറുപടി.
ഇടയ്ക്ക് എസ്ഐയെ തല്ലാൻ ഒരുങ്ങിയെങ്കിലും ഒപ്പമുണ്ടായിരുന്ന പോലീസുകാർ ഇടയ്ക്ക് കയറി പിടിച്ചുമാറ്റുകയായിരുന്നു. സംസ്ഥാനത്ത് രോഗവ്യാപനം കുറയ്ക്കാൻ നിയന്ത്രണങ്ങൾ കർശനമായി നടപ്പാക്കുമെന്ന് സർക്കാർ ആവർത്തിക്കുമ്പോഴും രാഷ്ട്രീയ സ്വാധീനത്തിൽ പോലീസിനെ പോലും വിരട്ടി ഇത് അട്ടിമറിക്കുന്ന സമീപനമാണ് ഭരണകക്ഷിയിലെ പ്രാദേശിക നേതാക്കൾ നടത്തുന്നത്.
നേരത്തെ ചെങ്ങന്നൂരിൽ എസ്എഫ്ഐ നേതാവ് ഉൾപ്പെടെ ഇത്തരത്തിൽ പോലീസിനെ ഭീഷണിപ്പെടുത്തുകയും വെല്ലുവിളിക്കുകയും ചെയ്തതും വിവാദമായിരുന്നു. സംസ്ഥാനത്ത് രണ്ടാം തരംഗം ആരംഭിച്ചതിന് ശേഷം ഇനിയും രോഗവ്യാപനം പൂർണമായി നിയന്ത്രിക്കാൻ കഴിഞ്ഞിട്ടില്ല. പ്രതിദിന രോഗബാധിതരുടെ ശരാശരി എണ്ണം പതിനായിരത്തിന് മുകളിലാണ്. ഈ സാഹചര്യത്തിൽ നിയന്ത്രണങ്ങൾ കർശനമായി നടപ്പിലാക്കണമെന്നാണ് പോലീസിന് ഉൾപ്പെടെ നൽകിയിരിക്കുന്ന നിർദ്ദേശം.
