നിരവധി നല്ല സിനിമകള്‍ മലയാള സിനിമ ലോകത്തിന് സമ്മാനിച്ച സംവിധായകനാണ് വിനയന്‍. ഒരിടവേളയ്‌ക്കു ശേഷം ശക്തമായ തിരിച്ചു വരവിനുളള തയ്യാറെടുപ്പിലാണ് വിനയന്‍. അദ്ദേഹത്തിന്റെ പുതിയ ചിത്രമായ പത്തൊമ്പതാം നൂറ്റാണ്ട് ബിഗ് ബജറ്റിലാണ് ഒരുങ്ങുന്നത്. മോഹന്‍ലാലിനൊപ്പം വിനയന്‍ സിനിമ ചെയ്യുന്നതിന്റെ വിശേഷങ്ങളാണ് സമൂഹ മാദ്ധ്യമങ്ങളില്‍ ചര്‍ച്ചചെയ്യപ്പെടുന്നത്.
‘മോഹന്‍ലാല്‍ തന്നോടൊപ്പം സിനിമ ചെയ്യാന്‍ സമ്മതിച്ചു എന്നും താരവുമൊത്തുള്ള ചിത്രം എല്ലാവരും ഓര്‍ത്തിരിക്കുന്ന ഒരു മാസ് എന്റെര്‍റ്റൈനെര്‍ ആയിരിക്കും’ എന്നുമാണ് വിനയന്‍ പറയുന്നത്. ചിത്രത്തിന്റെ കഥ ഇതുവരെ തീരുമാനിച്ചിട്ടില്ല. മോഹന്‍ലാലുമായി ചെയ്യുന്ന സിനിമയായതിനാല്‍ പ്രേക്ഷകര്‍ എന്നും ഓര്‍ത്തിരിക്കുന്ന ഒന്നായിരിക്കണം. നിലവില്‍ രണ്ട് കഥകളാണ് മനസിലുള്ളതെന്നും അദ്ദേഹം വ്യക്തമാക്കി.
തന്റെ പുതിയ ചിത്രം പത്തൊന്‍പതാം നൂറ്റാണ്ടിനേക്കാളും വലിയ ചിത്രമായിരിക്കും ഇതെന്നും വിനയന്‍ കൂട്ടിച്ചേര്‍ത്തു. സിജു വില്‍സണ്‍ മുഖ്യകഥാപാത്രത്തെ അവതരിപ്പിക്കുന്ന ചിത്രമാണ് പത്തൊന്‍പതാം നൂറ്റാണ്ട്. മലയാളത്തിലെ അന്‍പതോളം പ്രശസ്ത നടീനടന്‍മരും ഇന്ത്യയിലെ തന്നെ പ്രഗത്ഭരായ ടെക്‌നീഷ്യന്‍മാരും പങ്കെടുക്കുന്ന ചിത്രം നിര്‍മ്മിക്കുന്നത് ഗോകുലം ഗോപാലനാണ്.
