ചെന്നെ: ടോക്ക്യോ ഒളിമ്പിക്‌സിൽ മീര ഭായി ചാനുവിന്റെ മെഡൽ നേട്ടത്തിന് പിന്നാലെ ഒരു കുട്ടിയുടെ വീഡിയോ സമൂഹമാദ്ധ്യമങ്ങളിൽ വൈറലായിരുന്നു. ചാനുവിനെ അനുകരിക്കുന്ന കുട്ടിയുടേതായിരുന്നു വീഡിയോ. മീരഭായി ചാനുതന്നെ ഈ വീഡിയോ ഷെയർ ചെയ്തിരുന്നു. ആരാണ് ഈ കുട്ടിയെന്ന് കണ്ടെത്തിയിരിക്കുകയാണിപ്പോൾ. തമിഴ്‌നാട്ടിലെ ധർമ്മപുരി സ്വദേശിയായ ഹദ്‌വിദയാണ് ചാനുവിനെ അനുകരിച്ചത്.
മൂന്ന് വയസ്സാണ് ഹദ്‌വിദയ്‌ക്ക്. അമ്മയ്‌ക്കൊപ്പം ഒളിമ്പിക്‌സ് മത്സരങ്ങൾ കാണാറുണ്ടായിരുന്നു. കോമൺ വെൽത്ത് ഗെയിമിൽ ഭാരോദ്വഹനത്തിൽ സ്വർണ്ണമെഡൽ നേടിയ തമിഴ്‌നാട്ടുകാരൻ സതീഷ് ശിവലിംഗം പങ്കുവെച്ച വീഡിയോയാണ് ചാനു ഷെയർ ചെയ്തത്. മകളാണോ എന്ന ചോദ്യത്തിന് മറുപടി പറഞ്ഞ് മടുത്തതോടെയാണ് സതീഷ് തന്നെ കുട്ടിയെ കണ്ടെത്തിയത്. വീഡിയോകോൾ ചെയ്യുകയും സംസാരിക്കുകയും ചെയ്തു.
ടോക്ക്യോ ഒളിമ്പിക്‌സിൽ ഇന്ത്യയുടെ ആദ്യ മെഡൽ നേടിയ അഭിമാനതാരമാണ് മീര ഭായി ചാനു. സ്ത്രീകളുടെ 49 കിലോഗ്രാം ഭാരോദ്വഹനത്തിലാണ് മീരാഭായ് വെള്ളി നേടിയത്. ചാനുവിന്റെ മെഡൽ നേട്ടം രാജ്യത്തൊട്ടാകെ പ്രശംസിക്കപ്പെട്ടിരുന്നു. ഇതിനിടെയാണ് കുട്ടി ആരാധികയുടേയും വീഡിയോ വൈറലായത്.
So cute. Just love this. https://t.co/IGBHIfDrEk
— Saikhom Mirabai Chanu (@mirabai_chanu) July 26, 2021
