കോട്ടയം : നടനും, സംവിധായകനുമായ നാദിർഷയുടെ സിനിമകൾക്കെതിരെ ശക്തമായ പ്രതിഷേധവുമായി കത്തോലിക്ക കോൺഗ്രസ്. ഈശോ, കേശു ഈ വീടിന്റെ ഐശ്വര്യം എന്നീ സിനിമകൾക്കെതിരെയാണ് പ്രതിഷേധം. സിനിമകൾക്ക് അനുമതി നൽകരുതെന്ന് കത്തോലിക്ക കോൺഗ്രസ് ആവശ്യപ്പെട്ടു.
പേരുകൾ ക്രൈസ്തവ വിശ്വാസികളെ അവഹേളിക്കുന്നുവെന്ന് ആരോപിച്ചാണ് പ്രതിഷേധം. നാദിർഷയ്‌ക്കെതിരെ ഈ മാസം 11 ന് സെക്രട്ടറിയേറ്റിന് മുൻപിൽ ധർണ്ണ നടത്തുമെന്നും സംഘടന അറിയിച്ചു. ക്രൈസ്തവ വിശ്വാസികളെ അപമാനിക്കാനുള്ള ശ്രമം ഏറെ നാളായി നടക്കുന്നു. നാദിർഷയുടെ സാമ്പത്തിക സ്രോതസ് അന്വേഷണിക്കണം. പിന്നിൽ ഏതെങ്കിലും ശക്തികളുണ്ടോയെന്ന് സംശയിക്കുന്നതായും സംഘടന വ്യക്തമാക്കി.
ജയസൂര്യ നായകനാകുന്ന സിനിമയാണ് ഈശോ. സിനിമയുടെ പേര് വിശ്വാസികളെ അവഹേളിക്കുന്ന തരത്തിലാണെന്നാണ് ക്രൈസ്തവ വിശ്വാസികൾ ആരോപിക്കുന്നത്. പേരിനെ വിമർശിച്ച് പി സി ജോർജ് ഉൾപ്പെടെ രംഗത്ത് വന്നിരുന്നു.
എന്നാൽ സിനിമയുടെ പേര് മാറ്റില്ലെന്നാണ് നാദിർഷയുടെ നിലപാട്.സംഭവത്തിൽ നാദിർഷയെ ഫെഫ്ക പിന്തുണച്ചിട്ടുണ്ട്.
