മലയാളി ടെന്നിസ് താരം തൻവി ഭട്ടിനെ ദുബായിൽ മരിച്ച നിലയിൽ കണ്ടെത്തി

കൊച്ചി: വനിതാ ടെന്നിസ് താരത്തെ ദുബായിൽ മരിച്ച നിലയിൽ കണ്ടെത്തി. കൊച്ചി എളമക്കര സ്വദേശിനി തൻവി ഭട്ട് (21) ആണ് മരിച്ചത്. ആത്മഹത്യയാണെന്ന് പ്രാഥമിക നിഗമനം. ദുബായിലെ ഹാരിയറ്റ് വാട്ട് ആന്റ് മിഡിൽസെക്‌സ് കോളേജിലെ സൈക്കോളജി വിദ്യാർത്ഥിനിയായിരുന്നു.

2012ൽ ദോഹയിൽ നടന്ന അണ്ടർ 14 ഏഷ്യൻ സീരീസിൽ വിജയിയായിരുന്നു. ദേശീയ, സംസ്ഥാന മത്സരങ്ങളിൽ സ്വർണ്ണം നേടിയിട്ടുണ്ട്. പിന്നീട് പരിക്കേറ്റതിനെ തുടർന്ന് മത്സരങ്ങളിൽ നിന്ന് പിൻമാറി. പരിശീലനത്തിനിടെ നട്ടെല്ലിന് പരിക്കേൽക്കുകയായിരുന്നു. ദീർഘനാൾ ചികിത്സയിലും വിശ്രമത്തിനുശേഷം ഉന്നതപഠനത്തിനായി ദുബായിലേക്ക് പോയി. ടെന്നിസിലേക്ക് തിരിച്ചു വരാൻ കഴിയാത്തതിൽ കടുത്തനിരാശയിലായിരുന്നു തൻവി ഭട്ടെന്ന് സഹപാഠികൾ വെളിപ്പെടുത്തി.

എളമക്കര സ്വദേശിയായ ഡോ. സഞ്ജയ് ഭട്ടിന്റെയും ലൈലയുടെയും മകളാണ്. ടെന്നിസ് താരമായ ആദിത്യൻ സഹോദരനാണ്. മൃതദേഹം നാട്ടിലെത്തിച്ച് സംസ്‌കരിച്ചു. ദുബായിലെ മലയാളി സാമൂഹ്യ പ്രവർത്തകൻ അഷ്‌റഫ് താമരശ്ശേരി ഇടപെട്ടാണ് മൃതദേഹം നാട്ടിലെത്തിക്കാനുള്ള നടപടി പൂർത്തിയാക്കിയത്.