കൊച്ചി: വന്യമൃഗങ്ങളെ വേട്ടയാടി ഇറച്ചി വില്‍പന നടത്തിയ സംഭവവുമായി ബന്ധപ്പെട്ട് പ്രമുഖ സിനിമാ പ്രവര്‍ത്തകരെ ചോദ്യം ചെയ്യാനൊരുങ്ങി വനംവകുപ്പ്. കൊച്ചി, മട്ടാഞ്ചേരി മേഖലയില്‍ നിന്നുള്ള മൂന്ന് നിര്‍മ്മാതാക്കളെ ഉടന്‍ തന്നെ ചോദ്യം ചെയ്യും.
വന്യമൃഗങ്ങളുടെ മാംസം വില്‍പന നടത്തുന്ന സംഘത്തിലെ പ്രധാനി കഴിഞ്ഞ ദിവസം കൊച്ചിയില്‍ നിന്നും പിടിയിലായിരുന്നു. സിനിമാ നിര്‍മ്മാതാവിന്റെ എറണാകുളം കടവന്ത്രയിലുള്ള ഫ്‌ളാറ്റില്‍ നിന്നാണ് കൊല്ലം ആര്യങ്കാവ് സ്വദേശിയായ പത്തേക്കര്‍ പൂന്തോട്ടം സ്വദേശി വിനോദിനെ(42) അറസ്റ്റ് ചെയ്തത്.
ചോദ്യം ചെയ്യലിനിടെ വിനോദ് നല്‍കിയ വിവരങ്ങളുടെ അടിസ്ഥാനത്തിലാണ് നിര്‍മ്മാതാക്കളെ ചോദ്യം ചെയ്യാന്‍ ഫോറസ്റ്റ് ഒരുങ്ങുന്നത്. 3 പേര്‍ക്കെതിരെ ഇയാള്‍ മൊഴിനല്‍കിയിട്ടുണ്ട്. വന്യമൃഗങ്ങളെ വേട്ടയാടി മാംസം സിനിമാ നിര്‍മ്മാതാക്കള്‍ക്ക് കൈമാറുകയാണ് പതിവ്.
മാംസത്തിനുള്ള പണത്തിന് പുറമെ ആയുധങ്ങളും മറ്റ് സൗകര്യങ്ങളും ഏര്‍പ്പാടാക്കിയിരുന്നത് ഇവരാണെന്ന് മൊഴിയിലുണ്ട്. നിര്‍മ്മാതാക്കളുടെ പങ്കിനെ സംബന്ധിച്ച് വ്യക്തമായ സൂചന ലഭിച്ചതിനെ തുടര്‍ന്നാണ് കസ്റ്റഡിയിലെടുത്ത് ചോദ്യം ചെയ്യാനൊരുങ്ങുന്നത്.
ഈ മാസം 5 ന് രാത്രി ആര്യങ്കാവ് അമ്പനാട് വനമേഖലയില്‍ മൃഗവേട്ട നടത്തുന്നതിനിടെ 3 പേരെ വനംവകുപ്പ് പെട്രോളിംഗ് സംഘം പിടികൂടി. ആറംഗവേട്ട സംഘത്തിലുണ്ടായിരുന്ന വിനോദ് അടക്കമുള്ള 3 പേര്‍ ഓടി രക്ഷപ്പെട്ടു.
ഇയാളോടൊപ്പം മുങ്ങിയ രണ്ട് പേര്‍ ഇപ്പോഴും ഒളിവിലാണ്. പിടിയിലായവര്‍ നല്‍കിയ വിവരത്തിന്റെ അടിസ്ഥാനത്തില്‍ കൊച്ചിയിലെത്തി ബലപ്രയോഗത്തിലൂടെ വിനോദിനെ പിടികൂടുകയായിരുന്നുവെന്ന് വനംവകുപ്പ് ഉദ്യോഗസ്ഥര്‍ പറഞ്ഞു.
കാട്ടുപോത്ത്, മ്ലാവ്, മുള്ളന്‍പന്നി തുടങ്ങിയവയുള്‍പ്പെടെ 1200 കിലോഗ്രാം ഇറച്ചിയും പിടിച്ചെടുത്തു. കാട്ടുപോത്ത്, മുള്ളന്‍പന്നി തുടങ്ങിയവയുടെ തലയോട്ടികളും തോക്കുകളും പിടികൂടി. ക്രിമിനല്‍ – ലഹരി കേസുകളില്‍ പ്രതിയായ നിര്‍മ്മാതാവാണ് വേട്ടക്ക് പണം മുടക്കിയിരുന്നത്.
വേട്ടസംഘം പിടികൂടുന്ന മൃഗങ്ങളുടെ മാംസം അമ്പനാട്ട് വനമേഖലയിലെത്തി ശേഖരിക്കുന്നത് ഈനിര്‍മ്മതാവാണ്. നായാട്ടുസംഘം വനംവകുപ്പിന്റെ വലയിലായത് അറിഞ്ഞയുടന്‍ ഇയാള്‍ മുംബൈയിലേക്ക് കടന്നതായി വിവരം ലഭിച്ചിട്ടുണ്ട്. കോടതിയില്‍ ഹാജരാക്കിയ വിനോദിനെ റിമാന്‍ഡ് ചെയ്തു.
