മലപ്പുറം: കരിപ്പൂർ സ്വർണക്കവർച്ചാ കേസുമായി ബന്ധപ്പെട്ട് മുഖ്യപ്രതിയടക്കം മൂന്ന് പേർ പിടിയിൽ. വിദേശത്തുനിന്നും സ്വർണം കൊണ്ടുവരുന്ന കൊടുവള്ളി സംഘത്തിലുൾപ്പെട്ടവരാണ് ഇവർ.
കിഴക്കോത്ത് കൊടുവള്ളി ആവിലോറ സ്വദേശി പെരുച്ചാഴി ആപ്പു എന്ന പാറക്കൽ മുഹമ്മദ് (40), സ്വർണക്കടത്ത് സംഘത്തിലെ വാവാട് ബ്രദേഴ്‌സ് ഗ്രൂപ്പ് തലവൻ റസൂഫിന്റെ സഹോദരൻ കൊടുവള്ളി വാവാട് സ്വദേശി തെക്കേക്കണ്ണി പോയിൽ ജസീർ(31), കിഴക്കോത്ത് അബ്ദുൾ സലീം(45) എന്നിവരാണ് അറസ്റ്റിലായത്. അബ്ദുൽ സലീം പ്രതികൾക്ക് ഒളിവിൽ കഴിയാൻ സഹായം നൽകിയതിനാണ് അറസ്റ്റിലായത്.
പ്രതികൾ ഗോവയിലേക്ക് കടന്നതായി രഹസ്യവിവരം ലഭിച്ചതിനെ തുടർന്ന് അന്വേഷണ സംഘം അവിടെ എത്തുകയും ഗോവൻ പോലീസിന്റെ സഹായത്തോടെ പിൻതുടർന്നു. പോലീസിന്റെ നീക്കം മണത്തറിഞ്ഞ സംഘം കർണ്ണാടകയിലേക്ക് മുങ്ങി.
കർണ്ണാടക പോലീസിന്റെ സഹായത്തോടെ ബൽഗായിൽനിന്ന് പിടികൂടി. കൊണ്ടോട്ടി ഡി.വൈ.എസ്.പി കെ. ആഷറഫിന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് പ്രതികളെ വലയിലാക്കിയത്.
