ന്യൂഡൽഹി:വാക്സിനേഷൻ യജ്ഞത്തിൽ അനുദിനം മുന്നേറുകയാണ് ഇന്ത്യ. ഭാരത് ബയോടെക്കിന്റെ ഗുജറാത്തിലെ പ്ലാന്റിൽ നിന്നുള്ള ആദ്യ ബാച്ച് കോവാക്സിൻ കേന്ദ്ര ആരോഗ്യ വകുപ്പ് മന്ത്രി മൻസൂഖ് മാണ്ഡവിയ പുറത്തിറക്കി. ഗുജറാത്തിലെ ഭരൂപ് ജില്ലയിലെ അങ്കലേശ്വറിലാണ് പ്ലാന്റ് സ്ഥിതി ചെയ്യുന്നത്. പ്ലാന്റിൽ നിർമ്മിച്ച വിൽപ്പനയ്ക്കുള്ള ആദ്യ ബാച്ച് ആണ് കേന്ദ്ര മന്ത്രി പുറത്തിറക്കിയത്.
കൊറോണ വൈറസിനെതിരായ രാജ്യത്തിന്റെ പോരാട്ടം ശക്തിപ്പെടുത്തുന്നതിനുള്ള ഏറ്റവും പ്രധാനപെട്ട കാര്യം പ്രതിരോധകുത്തിവെയ്പ്പാണ്.പുതിയ പ്ലാന്റിൽ നിന്നുള്ള വാക്സിൻ രാജ്യത്തിന്റെ വാക്സിൻ വിതരത്തെ കൂടുതൽ ശക്തിപ്പെടുത്തും.കൂടാതെ വാക്സിൻ വേഗത്തിൽ എല്ലാ ഇന്ത്യക്കാരിലേക്കും എത്താൻ പുതിയ പ്ലാന്റ് സഹായിക്കും എന്ന് മാണ്ഡവിയ ട്വിറ്ററിൽ കുറിച്ചു.
കഴിഞ്ഞ മെയിൽ ആണ് ഭാരത് ബയോടെക്കിന്റെ ഗുജറാത്തിലെ പുതിയ പ്ലാന്റിൽ നിന്ന് 200 ദശലക്ഷം ഡോസ് വാക്സിൻ ഉത്പാദിപ്പിക്കാനുള്ള പദ്ധതി പ്രഖ്യാപിച്ചത്.
ഇന്ത്യ തദ്ദേശിയമായി വികസിപ്പിച്ച വാക്സിനാണ് കോവാക്സിൻ. കൊറോണയുടെ ഡെൽറ്റ വകഭേദത്തിനെതിരെ ഏറെ ഫലപ്രദമാണ് ഇതെന്ന് പഠനങ്ങൾ സൂചിപ്പിക്കുന്നത്.
അതേ സമയം കേന്ദ്ര ആരോഗ്യമന്ത്രാലയം പുറത്ത് വിട്ട കണക്കുകൾ പ്രകാരം രാജ്യവ്യാപകമായി നടത്തിയ വാക്സിനേഷൻ യജ്ഞം വഴി ഇതുവരെ 63.09 ഡോസ് കൊറോണ വാക്സിൻ വിതരണം ചെയ്തിട്ടുണ്ട്.
