ന്യൂയോർക്ക്: ഐക്യരാഷ്ട്ര രക്ഷാ സമിതി യോഗത്തിൽ ഇന്നുമുതൽ വിദേശകാര്യ സെക്രട്ടറി അദ്ധ്യക്ഷം വഹിക്കും. ഇന്ത്യൻ വിദേശകാര്യ സെക്രട്ടറി ഹർഷവർദ്ധൻ ഷ്രിംഗ്ല സുരക്ഷാസമിതി യോഗത്തിനായി ന്യൂയോർക്കിലെത്തി.
ആഗസ്റ്റ് മാസം മുഴുവൻ ഇന്ത്യയാണ് അദ്ധ്യക്ഷ സ്ഥാനത്ത്. ഇന്നും നാളെയുമായി നടക്കുന്ന യോഗത്തോടെ ഇന്ത്യയുടെ അദ്ധ്യക്ഷ പദവി കാലാവധി അവസാനിക്കുകയാണ്. പ്രധാനമന്ത്രി നരേന്ദ്രമോദിയും വിദേശകാര്യ മന്ത്രി എസ്.ജയശങ്കറും അദ്ധ്യക്ഷപദത്തിലിരുന്നുകൊണ്ട് ഈ മാസം തുടക്കത്തിൽ ലോകരാജ്യങ്ങളെ അഭിസംബോധന ചെയ്തിരുന്നു.
ആഗോള ഭീകരതയ്ക്കെതിരെ ശക്തമായ നിലപാടുകൾ മുന്നോട്ട് വെച്ച ഇന്ത്യ അഫ്ഗാൻ വിഷയത്തിലും ആഫ്രിക്കൻ മേഖലയിലെ ആക്രമണത്തേയും ശക്തമായി അപലപിച്ചു. വിവിധ മൂന്നാം ലോകരാജ്യങ്ങളിലും ദരിദ്രരാജ്യങ്ങളിലും പ്രവർത്തിക്കുന്ന സമാധാന സേനാംഗങ്ങൾക്ക് ആധുനിക ആയുധങ്ങളും സാങ്കേതിക ഉപകരണങ്ങളും നൽകണമെന്ന ഇന്ത്യയുടെ ആവശ്യവും പരക്കെ അംഗീകരിക്കപ്പെട്ടു. 2021-22 വർഷത്തെ കാലയളവിൽ ഇന്ത്യ ആദ്യമായാണ് സുരക്ഷാ സമിതിയുടെ അദ്ധ്യക്ഷ പദം അലങ്കരിക്കുന്നത്.
