ബാല്യകാലം കുട്ടികള് ആസ്വദിക്കാനുളളതാണ്. എന്നാല് ഇന്ന് ഭൂരിഭാഗം കുട്ടികളും മാനസികാരോഗ്യ പ്രശ്നങ്ങളുടെ ഇരകളായി മാറിയിരിക്കുന്നു. മാനസികാരോഗ്യ പ്രശ്നങ്ങള് കണ്ടെത്തുന്നതിനുള്ള പ്രക്രിയ വളരെ സങ്കീര്ണ്ണമാണ്. കുട്ടികളുടെ കാര്യത്തില് ഇത് കൂടുതല് കഠിനമാണ്. എന്നാല് യുഎസിലെ ഈ സ്കൂള് അധ്യാപകന് തന്റെ വിദ്യാര്ത്ഥികള് നേരിടുന്ന പ്രശ്നങ്ങള് മനസ്സിലാക്കുന്നതിനും,കുട്ടികളെ സഹായിക്കുന്നതിനനുമായി നൂതനമായ ഒരു വഴി തിരഞ്ഞെടുത്തിരിക്കുകയാണ്.
ടിക് ടോക്ക് വീഡിയോകളാണ് അഞ്ചാം ക്ലാസില് പഠിപ്പിക്കുന്ന അധ്യാപകന് കുട്ടികളുമായി ഇടപെടാനുള്ള ആയുധമാക്കി മാറ്റിയിരിക്കുന്നത്. കുട്ടികളിലെ വിഷാദരോഗം, അസ്വസ്ഥത, ദുരുപയോഗം തുടങ്ങിയ വിഷയങ്ങളെക്കുറിച്ചുള്ള തന്റെ തെറാപ്പിയ്ക്ക് അധ്യാപകന് തന്റെ സ്വന്തം നായയായ നളയെയും ഒപ്പം കൂട്ടിയിട്ടുണ്ട്. ‘പോയിന്റ് ഓഫ് വ്യൂ’ വീഡിയോയുമായി ടിക് ടോക്കില് ജോഷ് മണ്റോ എന്ന ഈ അധ്യാപകന് വൈറലാണ്.
കാര്യങ്ങള് സംഭവിക്കുമ്പോള് അവര് മുറിയില് തൊട്ടടുത്ത് ഉണ്ടെന്ന് കാഴ്ചക്കാരെ തോന്നിപ്പിക്കുക എന്നതാണ് ഈ വീഡിയോകള്ക്ക് പിന്നിലെ ലക്ഷ്യം.
കുട്ടികളുടെ മാനസികാരോഗ്യ പ്രശ്നങ്ങളും അവരുടെ വ്യക്തിപരമായ ആവശ്യകതയും മനസ്സിലാക്കുന്നതിന്റെ പ്രാധാന്യം ഉയര്ത്തിക്കാട്ടുന്നതാണ് മണ്റോയുടെ വീഡിയോകള്. വീഡിയോകളില്, കുട്ടികളോടുള്ള സ്നേഹവും വാത്സല്യവും പ്രകടമാക്കുന്നതിനൊപ്പം വിവിധ വെല്ലുവിളി നിറഞ്ഞ സാഹചര്യങ്ങളെ നേരിടാന് ശരിയായ രീതിയിലുള്ള സമീപനം പഠിപ്പിക്കുകയും ചെയ്യുന്നുണ്ട്. അദ്ദേഹത്തിന്റെ പ്രൊഫൈലിന് നിലവില് 8 ലക്ഷത്തിലധികം ഫോളോവേഴ്സ് ഉണ്ട്. മണ്റോയുടെ വീഡിയോകള് ഇതുവരെ 20 മില്യണിലധികം വ്യൂസും നേടിയിട്ടുണ്ട്.
