ബർലിൻ: ലോകകപ്പ് യോഗ്യതാ മത്സരത്തിൽ ഗോൾമഴ തീർത്ത് ജർമ്മനി. ഗ്രൂപ്പ് ജെയിൽ അർമേനിയയെ എതിരില്ലാത്ത ആറു ഗോളുകൾക്കാണ് ജർമ്മനിയുടെ ജയം.
സെർഗേ നാബ്രിയുടെ ഇരട്ട ഗോളുകളാണ് കളിയുടെ സവിശേഷത. മാർക്കസ് റിയസ്, തീമോ വർണർ, ജോനാസ് ഹോഫീമാൻ, കരീം അദേയേമി എന്നിവരും ഗോളുകൾ നേടി. കളിയുടെ ആറാം മിനിറ്റിലും 15-ാം മിനിറ്റിലും നാബ്രി തുടർച്ചയായ ഗോളുകളോടെ ടീമിന് 2-0ന്റെ ലീഡ് സമ്മാനിച്ചു.
കളിയുടെ ആദ്യപകുതിയിൽ രണ്ടു ഗോളുകൾ കൂടി ജർമ്മൻ താരങ്ങൾ അർമേനിയയുടെ വലയിലെത്തിച്ചു. മാർകോ റിയസും തീമോ വർണറുമാണ് 35, 44 മിനിറ്റുകളിൽ ഗോളുകൾ നേടിയത്. രണ്ടാം പകുതിയിലും ആക്രമണം ശക്തമാക്കിയ ജർമ്മനി രണ്ടു ഗോളുകൾ കൂടി നേടി. 52-ാം മിനിറ്റിൽ ഹോഫ്മാനും 90-ാംമിനിറ്റിൽ കരീം അദേയേമിയുമാണ് ഗോളുകൾ നേടിയത്.
