ന്യൂഡൽഹി: ഇന്ത്യൻ നിർമ്മിത ഇലക്ട്രിക് സ്കൂട്ടർ അമേരിക്കയിലും വിൽക്കാനൊരുങ്ങുകയാണ് ഒല.ഇന്ത്യയിൽ സ്കൂട്ടർ പ്രഖ്യാപിച്ചത് മുതൽ വിപണിയിൽ തരംഗം സൃഷ്ടിച്ചിരുന്നു.അത് അമേരിക്കൻ വിപണിയിലും ആവർത്തിക്കാനാവുമെന്നാണ് കമ്പനി കണക്കുകൂട്ടുന്നത്.
അടുത്ത വർഷം ആദ്യം തന്നെ യുഎസിൽ അവതരിപ്പിക്കാനാണു ശ്രമമെന്നു കമ്പനി ചീഫ് എക്സിക്യൂട്ടീവ് ഓഫീസർ ഭവിഷ് അഗർവാൾ പറഞ്ഞു. ഇതിന് മുന്നോടിയായി ലോകത്തിലെ ഏറ്റവും വലിയ വൈദ്യുത സ്കൂട്ടർ നിർമ്മാണശാലയാണ് ഒല ഇലക്ട്രിക് തമിഴ്നാട്ടിൽ സ്ഥാപിക്കുന്നത്.
തമിഴ്നാട്ടിലെ ഫാക്ടറിയുടെ ആദ്യ ഭാഗത്തിന്റെ നിർമ്മാണം ഏകദേശം പൂർത്തിയായിക്കഴിഞ്ഞു. വർഷം ഇരുപത് ലക്ഷം സ്കൂട്ടറുകൾ ഇവിടെ നിർമ്മിക്കാനാകും.ഒല ഇലക്ട്രിക്ക് സി.ഇ.ഒ തന്നെയാണ് വിദേശ വിപണിയിലും ചുവടുറപ്പിക്കാനുള്ള കമ്പനിയുടെ തീരുമാനം അറിയിച്ചത്. 2022ന്റെ തുടക്കം മുതലാണ് ഇലക്ട്രിക്ക് സ്കൂട്ടറുകൾ അമേരിക്കയിലേക്കു കയറ്റി അയക്കാൻ കമ്പനി ഒരുങ്ങുന്നത്.
കഴിഞ്ഞ സ്വാതന്ത്ര്യ ദിനത്തിലാണ് ഒല ഇലക്ട്രിക് ‘എസ് വൺ’, ‘എസ് വൺ പ്രോ’ സ്കൂട്ടറുകൾ അവതരിപ്പിച്ചത്. പത്തു നിറങ്ങളിലാണ് ഒലയുടെ ഇ സ്കൂട്ടറുകൾ വിൽപനയ്ക്കുള്ളത് ബുക്കിങ്ങ് റദ്ദാക്കുന്ന പക്ഷം മടക്കിനൽകുമെന്ന വ്യവസ്ഥയിൽ 499 രൂപ അഡ്വാൻസ് ഈടാക്കിയാണ് ഒല സ്കൂട്ടറിനുള്ള ബുക്കിങ് സ്വീകരിക്കുന്നത്. ഒലയുടെ ബുക്കിങ്ങ് വലിയ ആവേശത്തോടെയാണ് വാഹന പ്രേമികൾ ഏറ്റെടുത്തത്
