സിഡ്നി: മനുഷ്യരെ പോലെ തത്തകളും മൈനകളും സംസാരിക്കുന്നത് കേൾക്കാനും കാണാനും ഇടയായിട്ടുണ്ട്. എന്നാൽ ചില താറാവുകൾ സംസാരിക്കും എന്ന് കേട്ടതിൽ ഞെട്ടിയിരിക്കുകയാണ് ശാസ്ത്ര ലോകം. ഓസ്ട്രേലിയൻ മസ്ക് ഡക്ക് എന്നയിനം താറാവുകളിൽ നടത്തിയ പഠനത്തിലാണ് ഇക്കാര്യം തെളിഞ്ഞത്.
ഓസ്ട്രേലിയയുടെ തെക്ക്, പടിഞ്ഞാറൻ മേഖലകളിലും ടാൻസാനിയയിലുമാണ് മസ്ക് താറാവുകൾ കൂടുതൽ വസിക്കുന്നത്. ഇവയുടെ ദേഹത്തു നിന്നുണ്ടാകുന്ന പ്രത്യേകതരം ഗന്ധം മൂലമാണ് ഇവയ്ക്ക് മസ്ക് എന്നു പേരു കിട്ടിയെത്തെന്നും പറയപ്പെടുന്നു.
ഇൗ കുട്ടത്തിൽ റിപ്പർ എന്ന് പേരുളള താറാവിന്റെ ശബ്ദം പരിശോധിച്ചപ്പോൾ’യൂ ബ്ലഡി ഫൂൾ’ എന്നാണത്രേ കേട്ടത്. വർഷങ്ങൾക്ക് മുൻപാണ് റിപ്പറിന്റെ ശബ്ദം റെക്കോർഡ് ചെയ്തത്. ബ്ലഡി ഫൂൾ എന്നു പറയാൻ മാത്രമല്ല നിരവധി വാക്കുകൾ ഉച്ചരിക്കാനും ജനലുകളും കതകുകളുമൊക്കെ അടയുന്ന ശബ്ദങ്ങളും റിപ്പറിനു അനുകരിക്കാൻ സാധിക്കുമെന്നും ശാസ്ത്രജ്ഞർ പറഞ്ഞു.
അമ്മത്താറാവ് പുറപ്പെടുവിക്കുന്ന ശബ്ദം കേട്ടുമനസ്സിലാക്കി ആ രീതിയിൽ ശബ്ദം പുറപ്പെടുവിക്കാനാണ് ഇത്തരം താറാവുകൾ നോക്കാറുളളത്. എന്നാൽ റിപ്പറിന്റെ കാര്യത്തിൽ അങ്ങനെയല്ല. അമ്മയില്ലാത്ത റിപ്പർ വളർന്നത് ഫാമിലാണ്. ഫാം ഉടമയുടെ എപ്പോഴുമുളള സംഭാഷണശൈലി കേട്ട് പഠിച്ചതാകാമെന്നാണ് ശാസ്ത്രജ്ഞർ പറയുന്നു. മസ്ക് താറാവുകൾ ഇണതേടുമ്പോഴും ശബ്ദം വലിയ റോൾ വഹിക്കുന്നുണ്ട്. ഏറ്റവും നന്നായി ശബ്ദമുണ്ടാക്കുന്ന ആൺതാറാവിനെയാണ് പെൺതാറാവുകൾ കൂടുതലും ഇണയായി തിരഞ്ഞെടുക്കുന്നതെന്നു ജന്തുശാസ്ത്ര വിദഗ്ധർ പറയുന്നു.
