മാഞ്ചസ്റ്റർ: അഞ്ചാം ക്രിക്കറ്റ് ടെസ്റ്റ് തുടങ്ങാനിരിക്കെ ഇന്ത്യൻ ക്രിക്കറ്റ് സംഘത്തിൽ വീണ്ടും കൊറോണ. സംഘത്തിലെ സപ്പോർട്ട് സ്റ്റാഫിന് കൊറോണ സ്ഥിരീകരിച്ചതോടെ ഉച്ചകഴിഞ്ഞ് നടത്താനിരുന്ന പരിശീലന സെഷൻ ഉപേക്ഷിച്ചു. ഇംഗ്ലണ്ട് പര്യടനത്തിലെ ഒടുവിലത്തെ ക്രിക്കറ്റ് ടെസ്റ്റാണ് മാഞ്ചസ്റ്ററിൽ നാളെ നടക്കാനിരിക്കുന്നത്.
ഓവലിൽ മത്സരത്തിന് മുമ്പ് മുഖ്യ പരിശീലകൻ രവി ശാസ്ത്രിക്ക് രോഗബാധ കണ്ടെത്തിയിരുന്നു. തുടർന്ന് ശാസ്ത്രിയുമായി നേരിട്ട് സമ്പർക്കത്തിലേർപ്പെട്ട സംഘത്തിലെ മറ്റ് പരിശീലകർ നിരീക്ഷണത്തിലാക്കി. ഇവരിൽ രണ്ട് പേർ അടുത്ത ദിവസം തന്നെ പോസിറ്റീവ് ആയി. ഇതോടെ സംഘത്തിലെ നാലാമത്തെയാൾക്കാണ് രോഗം റിപ്പോർട്ട് ചെയ്യുന്നത്.
ഇന്ത്യ-ഇംഗ്ലണ്ട് ക്രിക്കറ്റ് പരമ്പരയിലെ അഞ്ചാം ടെസ്റ്റിനാണ് നാളെ മാഞ്ചസ്റ്ററിൽ തുടക്കമാകുന്നത്. ഓവലിൽ ജയിച്ച ഇന്ത്യ പരമ്പരയിൽ 2-1ന് മുന്നിലാണ്.
