പ്രയാഗ്രാജ്: നീതിന്യായ വ്യവസ്ഥയുടെ മികച്ച കേന്ദ്രമാക്കി ഇന്ത്യയെ മാറ്റുകയാണ് ലക്ഷ്യമെന്ന് കേന്ദ്ര നിയമകാര്യവകുപ്പ് മന്ത്രി കിരൺ റിജിജു. അന്താരാഷ്ട്ര നിലവാരമുള്ള കോടതികളും ന്യായാധിപന്മാരും ഇന്ത്യയിലുണ്ട്. കാലോചിതമായ പരിഷ്ക്കരണം വരുത്തുകയാണ് വേണ്ടത്. അന്താരാഷ്ട്ര നീതിന്യായ സംവിധാനങ്ങളുടെ കേന്ദ്രമാക്കി ഇന്ത്യയെ മാറ്റുക എന്നതാവണം നമ്മുടെ ലക്ഷ്യമെന്നും കേന്ദ്രമന്ത്രി പറഞ്ഞു.
പ്രയാഗ് രാജിൽ നിർമ്മിക്കാൻ പോകുന്ന ദേശീയ നിയമ സർവ്വകലാശാല കെട്ടിടത്തിന്റെ തറക്കല്ലിടൽ ചടങ്ങിൽ സംസാരിക്കുകയായിരുന്നു കേന്ദ്രനിയമകാര്യവകുപ്പ് മന്ത്രി.
നമുക്ക് ഇന്ത്യയെ ലോകനീതിന്യായ സംവിധാനങ്ങളുടെ കേന്ദ്രമാക്കി മാറ്റണം. അതിനായി നമ്മുടെ നീതിപീഠങ്ങളുടെ നിലവാരം ഇനിയും ഉയരേണ്ടതുണ്ട്. ഇതിന് സാധാരണക്കാരന് അതിവേഗം നീതി ലഭിക്കുന്ന മികച്ച നീതിനിർവ്വഹണ സംവിധാനം രൂപപ്പെടണമെന്നും കിരൺ റിജിജു പറഞ്ഞു.
രാഷ്ട്രപതി രാംനാഥ് കോവിന്ദ് സന്നിഹിതനായിരുന്ന ചടങ്ങിൽ സുപ്രീംകോടതി ചീഫ് ജസ്റ്റിസ് എൻ.വി.രമണ, ഉത്തർപ്രദേശ് ഗവർണർ ആനന്ദി ബെൻ പട്ടേൽ, മുഖ്യമന്ത്രി യോഗി ആദിത്യനാഥ് എന്നിവർ പങ്കെടുത്തു.
Comments