തൊടുപുഴ: പാലാ ബിഷപ്പ് മാർ ജോസഫ് കല്ലറങ്ങാട്ട് സംസാരിച്ചത് മയക്കുമരുന്നെന്ന വിപത്തിനെ കുറിച്ചാണെന്ന് കേരള കോൺഗ്രസ് നേതാവ് ജോസ് കെ മാണി. ബിഷപ്പിനെ മുഖ്യമന്ത്രി തള്ളിപ്പറഞ്ഞിട്ടില്ലെന്ന് ജോസ് കെ മാണി പറഞ്ഞു. മയക്കുമരുന്നെന്ന വിപത്തിനെതിരെ സാമൂഹ്യ ജാഗ്രത വേണമെന്നാണ് ബിഷപ്പ് പറഞ്ഞത്. ഒരു മതങ്ങളേയും ഉന്നംവെച്ചുള്ളതല്ല പ്രസ്താവനയെന്നും ജോസ് കെ മാണി പറഞ്ഞു.
മുഖ്യമന്ത്രിയും ഇടതുമുന്നണിയും പറഞ്ഞത് ഇക്കാര്യം തന്നെയാണെന്നും ജോസ് കെ മാണി പറഞ്ഞു. ലഹരിമരുന്ന് എന്ന സാമൂഹിക വിപത്ത് ചൂണ്ടിക്കാണിക്കുകയും അതിനെതിരെ ജാഗ്രത വേണമെന്ന് പറയുകയുമാണ് അദ്ദേഹം ചെയ്തത്. പാർട്ടിയുടെ നിലപാട് ബിഷപ്പിനെ അറിയിച്ചിട്ടുണ്ട്. ബിഷപ്പ് മാർ ജോസഫ് കല്ലറങ്ങാട്ടിനെ നേരിൽ കണ്ട ശേഷം മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.
അതേസമയം ബിഷപ്പിന്റെ പ്രസ്താവനയിൽ കേസെടുക്കാൻ ആലോചനയില്ലെന്ന് മുഖ്യമന്ത്രി ഇന്നലെ വ്യക്തമാക്കിയിരുന്നു. പാലാ ബിഷപ്പിന്റെ പ്രതികരണങ്ങൾ വന്നിട്ടുണ്ട്. അതിൽ മതസ്പർധയുണ്ടാക്കാൻ അദ്ദേഹം ഉദ്ദേശിച്ചിട്ടില്ല. തങ്ങളുടെ വിഭാഗത്തിന് ആവശ്യമായ മുന്നറിയിപ്പ് നൽകുകമാത്രമാണ് ഉദ്ദേശിച്ചതെന്ന് അറിയിച്ചിട്ടുണ്ടെന്നും മുഖ്യമന്ത്രി വ്യക്തമാക്കിയിരുന്നു.
