പ്രായം ഒന്നിനും തടസമല്ലെന്ന് നാം പറയാറുണ്ട്. അതിനു കാരണം പ്രായത്തെ വെല്ലുന്ന അവരുടെ പ്രകടനങ്ങളാണ്. ഇപ്പോഴിതാ അത്തരത്തില്‍ പ്രായത്തെ വെല്ലുന്ന പ്രകടനവുമായി ഒരു മുത്തശ്ശി. യൗവ്വനത്തിന്റെ ചുറുചുറുക്കോടെ കടലില്‍ മത്സ്യബന്ധനത്തിന് പോകുകയാണ് തന്റെ 101-ാം വയസ്സിലും ഈ മുത്തശ്ശി. വിര്‍ജീനിയ ഒലിവര്‍ എന്നാണ് ഈ മുത്തശ്ശിയുടെ പേര്. യുഎസ് വംശജയായ മുത്തശ്ശി പത്ത് വര്‍ഷത്തോളമായി കടലില്‍ പോയി കൊഞ്ചുകളെ പിടിയ്‌ക്കാന്‍ തുടങ്ങിയിട്ട്. പ്രായത്തിന്റെ അവശതകളൊന്നും തന്നെ ഈ മുത്തശ്ശിയുടെ ജോലിയെ തടസ്സപ്പെടുത്തുന്നില്ല എന്നതും കൗതുകകരമാണ്. 78 കാരനായ മകന്‍ മാക്സുമുണ്ട് ഈ മുത്തശ്ശിക്കൊപ്പം കടലില്‍ മത്സ്യബന്ധനത്തിന് പോകാന്‍.
കുട്ടിക്കാലം മുതല്‍ക്കേ കടലിനെ അടുത്തറിഞ്ഞിട്ടുള്ള ആളുകൂടിയാണ് ഒലിവര്‍. ഏഴ് വയസ്സ് മാത്രം പ്രായമുള്ളപ്പോള്‍ വിര്‍ജീനിയ ഒലിവര്‍ ആദ്യമായി കടലില്‍ പോയി. അതും അത്യാധുനിക സജ്ജീകരണങ്ങളൊന്നും നിലവിലില്ലാതിരുന്ന കാലത്ത്. പിന്നീടങ്ങോട്ട് പലപ്പോഴും ഉപജീവനമാര്‍ഗമായതും ഈ മത്സ്യബന്ധനം തന്നെയാണ്. പ്രായം ഏറിയതുകൊണ്ടുതന്നെ വിര്‍ജീനിയ ഒലിവര്‍ ഇക്കാലത്ത് കടലില്‍ പോകുമ്പോള്‍ പലരും നിരുത്സാഹപ്പെടുത്താറുണ്ട്. എന്നാല്‍ അത്തരം വാക്കുകള്‍ക്കൊന്നും ഈ മുത്തശ്ശിയുടെ ആത്മവിശ്വാസത്തെ തകര്‍ക്കാന്‍ സാധിച്ചിട്ടില്ല.
പറ്റുന്ന കാലത്തോളം മത്സ്യബന്ധനം തുടരും എന്ന് മാത്രമാണ് പിന്‍തിരിപ്പിക്കുന്നവരോട് ഒലിവര്‍ മുത്തശ്ശിക്ക് പറയാനുള്ളത്. കടല്‍യാത്രയുടെ കാര്യത്തിലും തെല്ലും ഭയമില്ല ഈ മുത്തശ്ശിക്ക്. പുലര്‍ച്ചെ തന്നെ മകനൊപ്പം ബോട്ടില്‍ യാത്ര തിരിക്കും. ചെറിയ മത്സ്യത്തെ ചൂണ്ടയില്‍ കൊരുത്തിയാണ് കൊഞ്ച് പിടിയ്‌ക്കുന്നത്. ഒലിവറിന്റെ പിതാവും കൊഞ്ചുപിടുത്തക്കാരനായിരുന്നു. അങ്ങനെയാണ് ചെറുപ്പം മുതല്‍ക്കേ വിര്‍ജീനിയ ഒലിവറും ഈ മേഖലയിലേയ്‌ക്ക് തിരിഞ്ഞത്. ഒരു ജോലി എന്നതിനും അപ്പുറം ഏറെ ആസ്വദിച്ചുകൊണ്ടുമാണ് ഒലിവര്‍ മുത്തശ്ശി മത്സ്യബന്ധനത്തില്‍ ഏര്‍പ്പെടുന്നതും.
