ലോർഡ്സ്: സുരക്ഷാ പ്രശ്നങ്ങളെ തുടർന്ന് ന്യൂസിലൻഡിന് പിന്നാലെ പാകിസ്താനെതിരായ പരമ്പരയിൽ നിന്നും പിന്മാറി ഇംഗ്ലണ്ട് ക്രിക്കറ്റ് ബോർഡും. തങ്ങളുടെ താരങ്ങളുടെയും സപ്പോർട്ടിംഗ് സ്റ്റാഫുകളുടെയും മാനസികവും ശാരീരികവുമായ സുരക്ഷയും ക്ഷേമവുമാണ് വലുതെന്നും അതിനാൽ പരമ്പരയിൽ നിന്ന് പിന്മാറുന്നതായും ഇംഗ്ലണ്ട് ക്രിക്കറ്റ് ക്രിക്കറ്റ് ബോർഡ് വ്യക്തമാക്കി. ഇതുമായി ബന്ധപ്പെട്ട് ബോർഡ് വാർത്താക്കുറിപ്പും പുറത്തിറക്കിയിട്ടുണ്ട്.
ട്വന്റി20 ലോകകപ്പിന് മുന്നോടിയായി പാകിസ്താനുമായി രണ്ട് സന്നാഹ മത്സരങ്ങൾ കളിക്കാനായിരുന്നു ഇംഗ്ലണ്ടിന്റെ തീരുമാനം. എന്നാൽ ന്യൂസിലൻഡ് പാകിസ്താനെതിരായ പരമ്പരയിൽ നിന്ന് പിന്മാറിയതോടെ ഇംഗ്ലീഷ് ബോർഡ് സ്ഥിതിഗതികൾ വിലയിരുത്താൻ പ്രത്യേക യോഗം ചേരുകയായിരുന്നു. ഈ യോഗത്തിലാണ് മത്സരത്തിൽ നിന്നും പിന്മാറാൻ ഇംഗ്ലണ്ട് ക്രിക്കറ്റ് ബോർഡ് തീരുമാനിച്ചത്.
ഇപ്പോൾ പാകിസ്താനുമായി മത്സരം നടത്തിയാൽ ടി20 ലോകകപ്പിന് തയ്യാറെടുക്കുന്ന ഇംഗ്ലണ്ട് ടീമിന്റെ മാനസിക നിലയെ അത് ബാധിക്കുമെന്നും അതിനാലാണ് പിന്മാറ്റമെന്നുമാണ് ഔദ്യോഗിക വാർത്താക്കുറിപ്പിൽ പറയുന്നത്. പാകിസ്താന് ഇപ്പോഴുണ്ടായ നിരാശ മനസിലാകുമെന്നും അവർക്കുണ്ടായ ബുദ്ധിമുട്ടിൽ ഖേദം പ്രകടിപ്പിക്കുന്നുവെന്നും വാർത്താക്കുറിപ്പിൽ ഇംഗ്ലീഷ് ക്രിക്കറ്റ് ബോർഡ് പറയുന്നു.
