ദുബായ്: ഐപിഎൽ ടി20യിൽ വിരാട് കോഹ് ലിയ്ക്കും സംഘത്തിനും വമ്പൻ തോൽവി. കൊൽക്കത്ത നൈറ്റ് റൈഡേഴ്സാണ് 9 വിക്കറ്റിന് റോയൽ ചലഞ്ചേഴ്സിനെ തകർത്തത്. കോഹ് ലി, ഡിവില്ലിയേഴ്, മാക്സ്വെൽ, ദേവദത്ത് പടിക്കൽ തുടങ്ങി കൂറ്റനടിക്കാരുടെ വലിയൊരു നിരതന്നെയുണ്ടായിട്ടും സ്കോർ 100 കടത്താൻ പോലും റോയൽ ചലഞ്ചേഴ്സിനായില്ല. 19 ഓവറിൽ സ്കോർ 92 എത്തിയപ്പോഴേയ്ക്കും ബംഗളൂരുവിന്റെ മുഴുവൻ താരങ്ങളും കൂടാരം കയറിയിരുന്നു.
ടോസ് നേടി ആദ്യം ബാറ്റ് ചെയ്ത ബാംഗ്ലൂരിനായി 4 താരങ്ങൾ മാത്രമാണ് രണ്ടക്കം കടന്നത്. 22 റൺസെടുത്ത ദേവദത്ത് പടിക്കലാണ് ടീമിന്റെ ടോപ് സ്കോറർ. മൂന്ന് വിക്കറ്റ് വീതം വീഴ്ത്തിയ വരുണ് ചക്രവര്ത്തി, ആന്ദ്രെ റസല് എന്നിവരാണ് ബാംഗ്ലൂര് ബാറ്റിംഗ് നിരയുടെ നട്ടെല്ലൊടിച്ചത്.
ചെറിയ വിജയലക്ഷ്യത്തിലേക്ക് സമ്മര്ദ്ദങ്ങളില്ലാതെയാണ് കൊല്ക്കത്തയുടെ ഓപ്പണര്മാര് ബാറ്റ് വീശിയത്. 93 റണ്സ് വിജയലക്ഷ്യം പിന്തുടര്ന്ന കൊല്ക്കത്ത 10 ഓവറില് ഒരു വിക്കറ്റ് മാത്രം നഷ്ടത്തില് വിജയലക്ഷ്യം മറികടന്നു. 48 റൺസെടുത്ത ശുഭ്മാന് ഗില്ലാണ് കൊൽക്കത്തയ്ക്ക് അനായാസ ജയം സമ്മാനിച്ചത്. സീസണിലെ മൂന്നാം ജയത്തോടെ കൊല്ക്കത്ത പ്ലേഓഫ് സാധ്യത നിലനിർത്തി.
