ന്യൂഡൽഹി: രാജ്യത്തെ എല്ലാ പൗരൻമാർക്കും ഡിജിറ്റൽ ആരോഗ്യ ഐഡി കാർഡുകൾ നൽകുന്ന ആയുഷ്മാൻ ഭാരത് ഡിജിറ്റൽ മിഷൻ പദ്ധതിയെ അഭിനന്ദിച്ച് ബിൽഗേറ്റ്സ്. പദ്ധതി ഇന്ത്യയുടെ ആരോഗ്യലക്ഷ്യങ്ങളിലേക്കുളള പുരോഗതിക്ക് വേഗം പകരുമെന്ന് ബിൽഗേറ്റ്സ് പറഞ്ഞു.
ഇത്തരം ഡിജിറ്റൽ ആരോഗ്യ അടിസ്ഥാന സൗകര്യങ്ങൾ നിഷ്പക്ഷമായ, എല്ലാവർക്കും പ്രാപ്യമായ ആരോഗ്യസംരക്ഷണം നൽകാൻ സഹായിക്കുമെന്നും ട്വിറ്ററിൽ ബിൽഗേറ്റ്സ് കുറിച്ചിരുന്നു. പദ്ധതി അവതരിപ്പിച്ചതിന് പ്രധാനമന്ത്രിയെ അഭിനന്ദിച്ചുകൊണ്ടായിരുന്നു ബിൽഗേറ്റ്സിന്റെ പോസ്റ്റ്.
ബിൽഗേറ്റ്സിന്റെ നല്ല വാക്കുകൾക്ക് നന്ദിയുണ്ടെന്ന് പ്രധാനമന്ത്രി മറുപടി നൽകി. ആരോഗ്യ അടിസ്ഥാനസൗകര്യങ്ങൾ മെച്ചപ്പെടുത്തുന്നതിന് സാങ്കേതികവിദ്യ പ്രയോജനപ്പെടുത്തുന്നതിൽ വളരെയധികം സാധ്യതകളുണ്ട്. ഈ ദിശയിൽ ഇന്ത്യ കഠിനമായി പ്രവർത്തിക്കുകയാണെന്നും പ്രധാനമന്ത്രി കുറിച്ചു.
രാജ്യത്തെ എല്ലാവർക്കും അത്യാധുനീക ചികിത്സാ സംവിധാനങ്ങൾ പ്രാപ്തമാക്കുകയെന്ന ലക്ഷ്യത്തോടെയാണ് ആയുഷ്മാൻ ഭാരത് ഡിജിറ്റൽ മിഷൻ പദ്ധതിക്ക് കേന്ദ്രസർക്കാർ തുടക്കം കുറിച്ചത്. പദ്ധതി പൂർത്തിയാകുന്നതോടെ ആളുകൾക്ക് മൊബൈൽ ആപ്പ് വഴി അവരുടെ ആരോഗ്യ വിവരങ്ങൾ അറിയാൻ സാധിക്കും. ഉപഭോക്താക്കളുടെ വിവരങ്ങളുടെ സ്വകാര്യത ഉറപ്പുവരുത്തിയാണ് പദ്ധതി നടപ്പിലാക്കുന്നത്. വിവരങ്ങൾ പരിശോധിക്കാനോ കൈമാറ്റം ചെയ്യാനോ ആളുകളുടെ അനുമതി ആവശ്യമാണ്.
