വാഷിങ്ടൺ: ഉറക്കത്തിനിടയിൽ കഴുത്തിൽ വവ്വാൽ കടിയേറ്റ് വൃദ്ധൻ പേവിഷബാധയേറ്റു മരിച്ചു. യുഎസിലെ ഇല്ലിനോയിസിനാണ് സംഭവം. 1954 ന് ശേഷം ഇല്ലിനോയിസിൽ റിപ്പോർട്ട് ചെയ്യുന്ന ആദ്യ പേവിഷബാധ മരണമാണിത്.
ലേക് കൗണ്ടിയിലെ വീട്ടിലാണ് 80കാരൻ താമസിച്ചിരുന്നത്. ഒരു മാസം മുൻപായിരുന്നു ഇയാൾ ഉണർന്നപ്പോൾ കഴുത്തിന് സമീപം വവ്വാലിനെ കണ്ടത്. പിന്നീട് വവ്വാലിന്റെ സാംപിൾ പരിശോധിച്ചപ്പോൾ പേവിഷബാധക്ക് കാരണമാകുന്ന റാബീസ് വൈറസ് സ്ഥിരീകരിച്ചിരുന്നു. ഇദ്ദേഹത്തിന്റെ വീട്ടിൽ വവ്വാലുകൾ കൂട്ടത്തോടെ ഉണ്ടായിരുന്നതായും കണ്ടെത്തിയിട്ടുണ്ട്.
പീന്നിടാണ് ഇയാൾക്ക് ലക്ഷണങ്ങൾ കണ്ടുതുടങ്ങിയത്. കഴുത്ത് വേദന, തലവേദന, വിരൽ മരവിപ്പ്, കൈകളുടെ നിയന്ത്രണമില്ലായ്മ, സംസാരിക്കാൻ പ്രയാസം തുടങ്ങിയവയായിരുന്നു ലക്ഷണങ്ങൾ. തുടർന്ന് ഇദ്ദേഹം മരിക്കുകയായിരുന്നു.
മരണനിരക്ക് ഏറ്റവുമുയർന്ന രോഗങ്ങളിലൊന്നാണ് റാബീസ് വൈറസ് ബാധയെന്ന് ഇല്ലിനോയിസ് ആരോഗ്യ വിഭാഗം ഡയറക്ടർ ഡോ. ഗോസി എസീക് വ്യക്തമാക്കി. എന്നാൽ പേവിഷബാധയേറ്റ ഉടനെ ചികിത്സ തേടിയാൽ ജീവൻ രക്ഷിക്കാനാകുമെന്നും അദ്ദേഹം ചൂണ്ടിക്കാട്ടി.
യു.എസിൽ ഒരു വർഷം ഒന്നോ മൂന്നോ പേർക്ക് മാത്രമാണ് റാബീസ് വൈറസ് സ്ഥിരീകരിക്കുന്നത്. എന്നാൽ 60,000 ത്തോളം പേർ ആന്റി റാബീസ് വാക്സിൻ സ്വീകരിക്കുന്നുണ്ട്. ഈ വൈറസുകൾ ശരീരത്തിന്റെ നാഡീവ്യൂഹത്തെ ബാധിച്ച് മസ്തിഷ്ക മരണത്തിനും കാരണമാവുകയും ചെയ്യുമെന്ന് ആരോഗ്യ വിഭാഗം വ്യക്തമാക്കുന്നു.
വവ്വാലുകളുമായി ഏതെങ്കിലും തരത്തിലുള്ള ഇടപഴകലിന് വിധേയമാകുന്നവർ അതിനെ സുരക്ഷിതമായി പിടികൂടി പരിശോധനക്ക് വിധേയമാക്കണമെന്ന് ആരോഗ്യ വിഭാഗം അറിയിച്ചു. ഇല്ലിനോയിസിൽ ഈ വർഷം 30 വവ്വാലുകളെ പരിശോധിച്ചതിൽ എല്ലാവയിലും റാബീസ് വൈറസ് സ്ഥിരീകരിച്ചിരുന്നു.
