ഇംഫാൽ: വ്യാജ ആധാർ കാർഡ് ഉപയോഗിച്ച് ഡൽഹിയിലേക്ക് കടക്കാൻ ശ്രമിച്ച പതിനാല് മ്യാൻമാർ പൗരന്മാർ പിടിയിൽ. മണിപ്പൂരിലെ ബിർ ടികേന്ദ്രജിത് അന്താരാഷ്ട്ര വിമാനത്താവളത്തിൽ വെച്ചാണ് ഇവരെ പിടികൂടിയത്.
ഒരു സ്ത്രീയടക്കം ഇരുപതു വയസ്സിന് താഴെയുള്ളവരാണ് വിമാനത്താവളത്തിലെ സുരക്ഷാ ഉദ്യോഗസ്ഥരുടെ പിടിയിലായത്. കൂടുതൽ അന്വേഷണത്തിന്റെ ഭാഗമായി ഇവരെ സിംഗ്ജാമി പോലീസിന് കൈമാറി.
അറസ്റ്റിലായവരിൽ പതിനൊന്ന് പേരെ ഒക്ടോബർ എട്ട് വരെ റിമാൻഡ് ചെയ്തതായി പോലീസ് പറഞ്ഞു. വിമാനത്താവളങ്ങളിലും മറ്റ് അതിർത്തി പ്രദേശങ്ങളിലും സുരക്ഷ ശക്തമാക്കിയതായും പോലീസ് കൂട്ടിച്ചേർത്തു.
സംഭവത്തിന്റെ ഗൗരവം ഭരണകൂടം മനസിലാക്കുന്നു. ഇത്തരത്തിൽ വ്യാജ രേഖകൾ ഉപയോഗിച്ച് രാജ്യത്തേയ്ക്ക് കടക്കാൻ ശ്രമിക്കുന്നവരെ മാതൃകാപരമായി ശിക്ഷിക്കുമെന്നും സമൂഹ മാദ്ധ്യമങ്ങളിലൂടെ സംഭവത്തിന്റെ ദൃശ്യങ്ങൾ പങ്കുവെച്ച മണിപ്പൂർ മുഖ്യമന്ത്രി എൻ ബിരേൻ സിംഗ് അറിയിച്ചു.
Comments