അബുദാബി: അവസാന ബോൾ വരെ ആവേശം നിറഞ്ഞ മത്സരത്തിൽ റോയൽ ചലഞ്ചേഴ്സ് ബംഗളൂരുവിനെ നാല് റൺസിന് തോൽപിച്ച് സൺറൈസേഴ്സ് ഹൈദരാബാദ് ആശ്വാസ വിജയം നേടി. ആദ്യം ബാറ്റ് ചെയ്ത സൺറൈസേഴ്സ് ഹൈദരാബാദ് ഏഴ് വിക്കറ്റ് നഷ്ടത്തിൽ 141 റൺസ് എടുത്തു. ഓപ്പണർ ജേസൺ റോയ് 44 ആണ് ഹൈദരാബാദ് ടീമിന്റെ ടോപ്പ് സ്കോറർ.
ക്യാപ്റ്റൻ കെയ്ൻ വില്യംസൺ 31 റൺസെടുത്തു. മറ്റ് താരങ്ങൾക്ക് കാര്യമായി സംഭാവന ചെയ്യാനായില്ല. ബംഗളൂരുവിന് വേണ്ടി ഹർഷൽ പട്ടേൽ മൂന്ന് വിക്കറ്റെടുത്തു. മറുപടി ബാറ്റിങ്ങിനിറങ്ങിയ ബംഗളൂവിന് താരതമ്യേന ചെറിയ സ്കോർ ആയ 141 മറികടക്കാനായില്ല.
നിശ്ചിത ഓവറിൽ ആറ് വിക്കറ്റ് നഷ്ടത്തിൽ 137 റൺസ് എടുക്കാനേ കഴിഞ്ഞുളളൂ. ഭുവനേശ്വർ കുമാർ എറിഞ്ഞ അവസാന ഓവറിൽ 13 റൺസാണ് ബംഗളൂരുവിന് ജയിക്കാൻ വേണ്ടിയിരുന്നത്. എന്നാൽവെറും എട്ട് റൺസ് മാത്രമാണ് എടുക്കാൻ കഴിഞ്ഞത്.
ബംഗളൂരുവിന് വേണ്ടി ദേവ്ദത്ത് പടിക്കൽ 41, ഗ്ലെൻ മാക്സേവെൽ 40 എന്നിവർ നന്നായി കളിച്ചെങ്കിലും വിജയത്തിലേക്ക് നയിക്കാൻ മധ്യനിരയ്ക്ക് കഴിഞ്ഞില്ല. വിജയിക്കാൻ ആയില്ലെങ്കിലും പോയന്റ് പട്ടികയിൽ മൂന്നാം സ്ഥാനത്തുളള ബംഗളൂരു പ്ലേഓഫ് സാധ്യത നിലനിർത്തി. ഹൈദരാബാദ് വെറും ആറ് പോയിന്റുമായി അവസാന സ്ഥാനത്താണ്.
Comments