ബംഗലൂരു: രാഹുൽ കോൺഗ്രസ് പ്രസിഡന്റാകണമെന്നാണ് പ്രവർത്തകരുടെ ആഗ്രഹമെന്ന് കർണാടകയിലെ കോൺഗ്രസ് അദ്ധ്യക്ഷൻ ഡി.കെ ശിവകുമാർ. രാജ്യത്തൊട്ടാകെയുളള പാർട്ടി പ്രവർത്തകരുടെ അഭിപ്രായം ഇതാണെന്നും ശിവകുമാർ പറഞ്ഞു.
തന്റെ മേലുളള 90 ശതമാനം ഉത്തരവാദിത്വങ്ങളും ഒഴിവാക്കുകയാണ് രാഹുൽ. എന്നാൽ അദ്ദേഹത്തെ ഉത്തരവാദിത്വങ്ങൾ ഏറ്റെടുപ്പിക്കാനാണ് പാർട്ടി പ്രവർത്തകരുടെ ആഗ്രഹം. അദ്ധ്യക്ഷ പദവി ഒഴിഞ്ഞപ്പോൾ മുതൽ അദ്ദേഹത്തിൽ സമ്മർദ്ദം ചെലുത്തുന്നുണ്ട്.
കോൺഗ്രസ് പ്രവർത്തക സമിതിയോഗത്തിന് മുന്നോടിയായിട്ടാണ് ഡി.കെ ശിവകുമാറിന്റെ അഭിപ്രായം. പുതിയ അദ്ധ്യക്ഷന്റെ കാര്യം യോഗത്തിൽ ചർച്ചയാകുമെന്നാണ് സൂചന. ഈ മാസം 16 നാണ് യോഗം.
രാഹുലിനെ കോൺഗ്രസ് അദ്ധ്യക്ഷനാക്കണമെന്ന് ആവശ്യപ്പെട്ട് പാർട്ടിയുടെ സോഷ്യൽ മീഡിയ വിഭാഗം കഴിഞ്ഞ മാസം പ്രമേയം പാസാക്കിയിരുന്നു. യൂത്ത് കോൺഗ്രസിന്റെയും എൻഎസ് യു ഐയുടെയും ദേശീയ എക്സിക്യൂട്ടീവ് യോഗങ്ങളിലും സമാനമായ പ്രമേയം പാസാക്കപ്പെട്ടിരുന്നു. നിലവിൽ സോണിയാ ഗാന്ധിയാണ് പാർ്ട്ടിയുടെ ഇടക്കാല അദ്ധ്യക്ഷ. സംഘടനാ തെരഞ്ഞെടുപ്പിന് പാർട്ടി തെരഞ്ഞെടുപ്പ് അതോറിറ്റി അനുമതി നൽകിയിരുന്നെങ്കിലും വിവിധ സംസ്ഥാനങ്ങളിലെ നിയമസഭാ തെരഞ്ഞെടുപ്പും കൊറോണ സാഹചര്യങ്ങളും പരിഗണിച്ച് വൈകിപ്പിക്കുകയായിരുന്നു.
Comments