ന്യൂഡൽഹി: കൊറോണ പ്രതിരോധ വാക്സിനായ സൈഡസ് കാഡിലയുടെ 60 ലക്ഷത്തിലധികം ഡോസുകൾ തയ്യാറായതായി കേന്ദ്രസർക്കാർ. അഹമദാബാദ് ആസ്ഥാനമായ കമ്പനിയാണ് സൈക്കോവ്-ഡി എന്ന ഡിഎൻഎ വാക്സിൻ വികസിപ്പിച്ചത്. മരുന്നിന് അടിയന്തിര ഉപയോഗത്തിനായി ഓഗസ്റ്റ് 20ന് ഡ്രഗ്സ് കൺട്രോളർ ജനറൽ ഓഫ് ഇന്ത്യ അനുമതി നൽകിയിരുന്നു. സൈക്കോവ്-ഡി വാക്സിൻ സ്വീകരിക്കേണ്ടത് 28 ദിവസം ഇടവിട്ടാണ്.
ആദ്യ വാക്സിൻ സ്വീകരിച്ചാൽ രണ്ടാമത്തേത് 28ാം ദിവസത്തിലും, മൂന്നാമത്തെ 56ാം ദിവസവും എടുക്കണം. ഒക്ടോബറിൽ ഇന്ത്യ 28 കോടി വാക്സിനാണ് ഉത്പാദിപ്പിക്കുന്നത്. ഇതിൽ 22 കോടി സെറം ഇൻസ്റ്റിറ്റ്യൂട്ടിന്റെ കോവിഷീൽഡും ആറ് കോടി ഭാരത് ബയോടെകിന്റെ കോവാക്സിനുമാണ്. ഇതിനുപുറമെയാണ് സൈക്കോവ്-ഡിയുടെ ഉത്പാദനം.
ഇന്ത്യയിൽ ഏറ്റവും കൂടുതൽ ആളുകളിൽ ക്ലിനിക്കൽ ട്രയൽ നടത്തിയ സൈകോവ്-ഡി വാക്സിൻ പന്ത്രണ്ട് വയസിൽ കൂടുതൽ പ്രായമുള്ള കുട്ടികൾക്കും നൽകാൻ കഴിയുമെന്ന് കമ്പനി അറിയിച്ചു. ഭാരത് ബയോട്ടെക്കിന്റെ കൊവാക്സിന് ശേഷം രാജ്യത്ത് തദ്ദേശീയമായി നിർമ്മിക്കുന്ന രണ്ടാമത്തെ വാക്സിനാണ് സൈക്കോവ്-ഡി.
രാജ്യത്ത് 12 മുതൽ 18 വയസുവരെയുള്ളവരിൽ പരീക്ഷണം നടത്തിയ ആദ്യത്തെ വാക്സിൻ കൂടിയാണിത്. വിവിധ ഇടങ്ങളിലായി 50 കേന്ദ്രങ്ങളിലാണ് ക്ലിനിക്കൽ ട്രയൽ നടന്നത്. 1000 ത്തോളം ആളുകളിൽ നടത്തിയ പരീക്ഷണത്തിൽ വാക്സിൻ സുരക്ഷിതമാണെന്ന് കണ്ടെത്തി. ലോകത്തിലെ ആദ്യത്തെ ഡിഎൻഎ അടിസ്ഥാനമാക്കിയുള്ള സൂചിരഹിത കൊറോണ വാക്സിനാണ് തദ്ദേശിയമായി വികസിപ്പിച്ചെടുത്ത സൈകോവ്-ഡി. പന്ത്രണ്ട് വയസിന് മുകളിലുള്ളവർക്കും നൽകാൻ അംഗീകരിച്ച ആദ്യ വാക്സിൻ കൂടിയാണിത്.
രാജ്യത്ത് അടിയന്തിര ഉപയോഗത്തിന് അനുമതി ലഭിക്കുന്ന ആറാമത്തെ വാക്സിനാണ് സൈക്കോവ്-ഡി. കൊറോണയുടെ ഡെൽറ്റാ വകഭേദത്തിനെതിരെ വാക്സിൻ 66 ശതമാനം ഫലപ്രദമാണെന്ന് പഠനത്തിൽ കണ്ടെത്തിയിരുന്നു. ഫാർമജെറ്റ് എന്ന ഇൻജക്ടിംഗ് ഗൺ കുത്തിവെക്കന്നത് പോലെ അമർത്തുമ്പോൾ വാക്സിൻ ശരീരത്തിലേയ്ക്ക് പ്രവേശിക്കും. കുത്തിവെപ്പില്ലാതെ നൽകുന്ന നീഡിൽ ഫ്രീ വാക്സിൻ ആണ് സൈക്കോവ് -ഡി വാക്സിൻ.
സെപ്തംബറിൽ ഇന്ത്യ 26 കോടി കൊറോണ വാക്സിൻ ഉത്പാദിപ്പിച്ചിരുന്നു. രാജ്യം കൊറോണ വാക്സിൻ കയറ്റുമതിയും പുനരാരംഭിച്ചിട്ടുണ്ട്. ഒക്ടോബർ 18നകം 100 കോടി ഡോസ് നൽകാനാണ് കോന്ദ്ര സർക്കാർ ലക്ഷ്യമിടുന്നത്. ഇതുവരെ 97 കോടിയിലധികം നൽകി കഴിഞ്ഞു. 100 കോടി നേട്ടം വലിയ ആഘോഷമാക്കാനാണ് കേന്ദ്ര ആരോഗ്യമന്ത്രാലയത്തിന്റെ ലക്ഷ്യം. കേന്ദ്ര സർക്കാർ ആരോഗ്യപ്രവർത്തകരെയും കൊറോണ പോരാളികളെയും ഇതിൽ പങ്കാളികളാകും. പ്രധാനമന്ത്രി നരേന്ദ്രമോദിയുടെ ജന്മദിനമായ സെപ്തംബർ 17ന് ഇന്ത്യ 2.5 കോടി വാക്സിൻ നൽകി റെക്കോർഡ് സൃഷ്ടിച്ചിരുന്നു.
.
:
