നാഗ്പ്പൂർ: വിജയദശമിയോടനുബന്ധിച്ച് ഇന്ന് രാഷ്ട്രീയ സ്വയംസേവക സംഘം 96-ാം പിറന്നാൾ ആഘോഷ നിറവിൽ. സർസംഘചാലക് ഡോ. മോഹൻ ഭാഗവത് നാഗ്പ്പൂരിൽ നടക്കുന്ന വിജയദശമി സാംഘിക്കിൽ സന്ദേശം നൽകും. രാവിലെ ഏഴര മണിക്ക് വിവിധ ചാനലുകളിലും ഫേസ്ബുക്ക് പേജുകളിലും വിജയദശമി സന്ദേശത്തിന്റെ ലൈവ് ആരംഭിക്കും.
https://www.rss.org/
https://www.facebook.com/RSSOrg
നാഗ്പ്പൂരിലെ രേശംബാഗിൽ നടക്കുന്ന സാംഘിക്കിലാണ് മോഹൻഭാഗവത് സന്ദേശം നൽകുന്നത്. രാജ്യത്തെ എല്ലാ ഗ്രാമനഗരകേന്ദ്രങ്ങളിലും മൂന്ന് ദിവസങ്ങളിലായി വിജയദശമി ആഘോഷങ്ങളും സാംഘിക്കുകളും നടക്കുകയാണ്. 1925 ലെ വിജയദശമി ദിനത്തിലാണ് ഡോ. കേശവ ബലിറാം ഹെഡ്ഗേവാർ രാഷ്ട്രീയ സ്വയംസേവക സംഘം സ്ഥാപിക്കുന്നത്. നാഗ്പ്പൂരിലെ രേഷംബാഗിലെ മോഹിതെവാഡ സംഘസ്ഥാനിലായിരുന്നു ആർ.എസ്.എസിന്റെ തുടക്കം. വിദ്യാർത്ഥികളായ കുറച്ച് പേർക്കൊപ്പമായിരുന്നു ഡോക്ടർ ഹെഡ്ഗേവാർ സംഘം ആരംഭിച്ചത്.
തൊണ്ണൂറ്റി ആറു വർഷം പൂർത്തിയാകുമ്പോൾ രാഷ്ട്രത്തിനു മാത്രമല്ല മുഴുവൻ ലോകക്രമത്തിലും സ്വാധീന ശക്തിയായ സംഘടനയായി ആർ.എസ്.എസ് മാറിയിരിക്കുകയാണ്. സാമൂഹ്യ,സാംസ്കാരിക, സേവന,വിദ്യാഭ്യാസ,തൊഴിലാളി മേഖലകളിൽ ആരംഭിച്ച വിവിധ പ്രസ്ഥാനങ്ങൾ ഇന്ന് രാജ്യത്തിനകത്തും പുറത്തുമായി ജനസേവനം നടത്തുന്നുണ്ട്. ഇന്ത്യക്ക് പുറത്ത് പല ലോക രാജ്യങ്ങളിലും ഹൈന്ദവ ജാഗരണ പ്രവർത്തനങ്ങൾക്കാണ് മുൻതൂക്കം. വിവിധ രാജ്യങ്ങളിലെ ഭരണാധികാരികൾ വരെ ആർ.എസ്.എസ് വിശ്വവിഭാഗിന്റെ പരിപാടികളിൽ പങ്കെടുത്തു ആശംസകൾ നേരാറുമുണ്ട്.
