കൊച്ചി: മോൻസൻ മാവുങ്കലിനെതിരെ പോക്സോ കേസ്. പ്രായപൂർത്തിയാകാത്ത പെൺകുട്ടിയെ പീഡിപ്പിച്ചെന്ന പരാതിയിലാണ് കേസ്. എറണാകുളം നോർത്ത് പോലീസാണ് കേസ് രജിസ്റ്റർ ചെയ്തിരിക്കുന്നത്. മോൻസൻ മാവുങ്കലിന്റെ കൊച്ചിയിലെ വീട്ടിൽ വച്ചായിരുന്നു പീഡനം. തുടർവിദ്യാഭ്യാസം വാഗ്ദാനം ചെയ്താണ് പീഡിപ്പിച്ചതെന്ന് പരാതിയിൽ പറയുന്നു.
2013ലാണ് കേസിനാസ്പദമായ സംഭവം നടക്കുന്നത്. 17 വയസ്സുള്ളപ്പോഴാണ് പീഡനം നടന്നതെന്ന് പെൺകുട്ടിയും അമ്മയും ആരോപിക്കുന്നു. ഈ സാഹചര്യത്തിലാണ് മോൻസനെതിരെ പോക്സോ കേസ് ചുമത്തിയത്. നിലവിൽ ക്രൈംബ്രാഞ്ചാണ് മോൻസനെതിരായ കേസ് അന്വേഷിക്കുന്നത്. അതിനാൽ തന്നെ ഈ സംഭവവും ക്രൈംബ്രാഞ്ചിന്റെ അന്വേഷണ പരിധിയിൽ ഉൾപ്പെടുത്തിയേക്കും.
കഴിഞ്ഞ ദിവസമാണ് പെൺകുട്ടിയും അമ്മയും മോൻസനെതിരായ പരാതി നോർത്ത് പോലീസ് സ്റ്റേനിൽ നൽകുന്നത്. മോൻസന്റെ സ്വാധീനത്തെ കുറിച്ചുള്ള ഭയംകൊണ്ടാണ് ഇത്രയും നാളും ഇക്കാര്യം പുറത്ത് പറയാതിരുന്നതെന്ന് പെൺകുട്ടി മൊഴിയിൽ പറയുന്നു.
Comments