കട്ടപ്പന: ഇടുക്കി മെഡിക്കൽ കോളേജിൽ നവംബർ ഒന്നിന് ഐപി വിഭാഗം പ്രവർത്തനം ആരംഭിക്കും. നിലവിൽ ഓഫ്തൽമോളജി, ഡെർമറ്റോളജി ഒ.പി വിഭാഗങ്ങൾ ഇവിടെ പവർത്തിക്കുന്നുണ്ട്. ഇതിന് പുറമേ ഇവയുടെ ഐപി വിഭാഗവും ആരംഭിക്കാനാണ് തീരുമാനം.
മന്ത്രി റോഷി അഗസ്റ്റ്യന്റെ അദ്ധ്യക്ഷതയിൽ ജില്ലാ കളക്ടറുടെ ചേമ്പറിൽ ചേർന്ന യോഗത്തിലാണ് ഇക്കാര്യം തീരുമാനിച്ചത്. പുതിയ ബ്ലോക്കിൽ സർജറി, ഓർത്തോപീഡിയോളജി ഒ.പി വിഭാഗവും ആരംഭിക്കും. പുതിയ ബ്ലോക്കിലെ സാങ്കേതിക നിർമ്മാണ പ്രവർത്തനങ്ങൾ ഉടൻ പൂർത്തിയാക്കണമെന്ന് മന്ത്രി കരാറുകാരോട് ആവശ്യപ്പെട്ടു.
ക്യാൻസർ സ്ക്രീനിംഗ് സെന്റർ, എമർജൻസി മെഡിസിൻ യൂണിറ്റ് തുടങ്ങിയവ ആരംഭിക്കുന്നതിനുള്ള നടപടികളും പൂർത്തിയാകുന്നതായി യോഗം വിലയിരുത്തി. യോഗത്തിൽ ജില്ലാ കളക്ടർ ഷീബ ജോർജ്ജ്, ജില്ലാ മെഡിക്കൽ ഓഫീസർ ഡോ.എൻ.പ്രീയ, എച്ച്.എം.സി അംഗങ്ങളായ സി.വി വർഗീസ്, ഷിജോ തടത്തിൽ, ആർ.എം.ഒ ഡോ. അരുൺ തുടങ്ങിയവർ പങ്കെടുത്തു.
Comments