തിരുവനന്തപുരം: മുൻ മുഖ്യമന്ത്രി വി.എസ്.അച്യുതാനന്ദന് പിറന്നാൾ ആശംസകളുമായി മുഖ്യമന്ത്രി പിണറായി വിജയൻ. നിസ്വ വർഗ്ഗത്തിന്റെ പോരാട്ട ചരിത്രത്തിലെ നേതൃസ്തംഭമായ പ്രിയ സഖാവ് വി എസിന് ജന്മദിന ആശംസകൾ നേരുന്നുവെന്ന് അദ്ദേഹം കുറിച്ചു. ഫേസ്ബുക്കിലൂടെയാണ് ആശംസകൾ നേർന്നത്. വി.എസ്.അച്യുതാനന്ദന്റെ 98ാം പിറന്നാളാണ് ഇന്ന്. തിരുവനന്തപുരം ബാർട്ടൻഹിൽ വേലിക്കകത്ത് വീട്ടിൽ പൂർണവിശ്രമത്തിലാണ് അദ്ദേഹം. കൊറോണയുടെ പശ്ചാത്തലത്തിൽ കുടുംബാംഗങ്ങൾ മാത്രമായി ലളിതമായിട്ടായിരിക്കും ജന്മദിന ആഘോഷം.
ഒന്നാം പിണറായി സർക്കാരിൽ ഭരണ പരിഷ്കരണ കമ്മീഷൻ അധ്യക്ഷനായിരുന്ന വി.എസ് 2021 ജനുവരിയിൽ പദവി രാജി വച്ചിരുന്നു. പക്ഷാഘാതമുണ്ടായതിനാൽ എഴുന്നേറ്റ് നടക്കാൻ മറ്റൊരാളുടെ സഹായം വേണം. വീട്ടിനകത്തും കൂടുതൽ സമയവും വീൽചെയറിൽ തന്നെയാണ്. പത്രം ദിവസവും വായിച്ച് കേൾക്കും. ടെലിവിഷൻ വാർത്തകളും മുടക്കാറില്ല. കേരളത്തെ വീണ്ടും പ്രളയക്കെടുതി ബാധിച്ച വാർത്തകൾ അദ്ദേഹത്തെ അസ്വസ്ഥനാക്കിയെന്ന് മകൻ വി.എ.അരുൺകുമാർ പറഞ്ഞു. പശ്ചിമഘട്ട സംരക്ഷണത്തിനായുള്ള ഗാഡ്ഗിൽ കമ്മിറ്റി റിപ്പോർട്ടിനെ ശക്തമായി പിന്തുണച്ച നേതാക്കളിലൊരാളായിരുന്നു വിഎസ്.
Comments