ചെറുതോണി: ഇടുക്കി ഡാമിൽ ജലനിരപ്പ് പരമാവധി സംഭരണ ശേഷിയിലേക്ക് എത്തുന്ന സാഹചര്യത്തിൽ വീണ്ടും റെഡ് അലെർട്ട് പുറപ്പെടുവിച്ചു. അണക്കെട്ടിന്റെ പൂർണ സംഭരണ ശേഷി 2403 അടിയാണ്. വൈകിട്ട് ആറ് മണി വരെ 2398.28 ആണ് അണക്കെട്ടിലെ ജലനിരപ്പ്. സംഭരണ ശേഷിയുടെ 94.47 ശതമാനമാണിത്. തുടർന്നാണ് ഏഴ് മണി മുതൽ റെഡ് അലെർട്ട് പ്രഖ്യാപിച്ചത്.
നിലവിൽ ജലനിരപ്പ് ക്രമീകരിക്കാനായി ചെറുതോണി ഡാമിന്റെ മൂന്ന് ഷട്ടറുകൾ 35 സെന്റീമീറ്റർ വീതം ഉയർത്തി 100 ക്യൂമെക്സ് ജലം പുറത്തേക്ക് ഒഴുക്കുന്നുണ്ട്. ജില്ലയിൽ കാലാവസ്ഥാ വകുപ്പ് ഓറഞ്ച് അലെർട്ടാണ് പ്രഖ്യാപിച്ചിരിക്കുന്നത്. ഡാമിന്റെ വൃഷ്ടി പ്രദേശത്ത് തുടർച്ചയായ മഴ ലഭിച്ചതും റെഡ് അലെർട്ട് പ്രഖ്യാപിക്കാൻ കാരണമായി.
ഇടുക്കിയിൽ നിന്നും കൂടുതൽ ജലം പുറത്തേക്ക് ഒഴുക്കേണ്ട സാഹചര്യം ഉണ്ടായാൽ ജനങ്ങളുടെ സുരക്ഷ ഉറപ്പുവരുത്തണമെന്ന് ദുരന്ത നിവാരണ അതോറിറ്റി ചെയർമാൻ കൂടിയായ ജില്ലാ കളക്ടർ ഉത്തരവ് പുറപ്പെടുവിച്ചു.
