ദുബൈ : വിനോദസഞ്ചാരരംഗത്തെ പുതിയ ആകർഷണമായ ലോകത്തിലെ ഏറ്റവും വലിയ നിരീക്ഷണചക്രം (ഒബ്‌സർവേഷൻ വീൽ) ദുബൈയിൽ തുറന്നു. ഐൻ ദുബായ് എന്ന് പേരിട്ടിരിക്കുന്ന നിർമിതിയ്‌ക്ക് 820 അടി ഉയരമുണ്ട്. സ്വപ്‌ന നഗരത്തിന്റെ ഭംഗി ആകാശത്തുനിന്ന് 360 ഡിഗ്രിയിൽ സന്ദർശകർക്ക് ആസ്വദിക്കാനുള്ള അവസരമാണിത് തുറന്നിടുന്നത്.
48 കാബിനുകളാണ് ഇതിൽ ഒരുക്കിയിട്ടുള്ളത്. ഒരുതവണ ചക്രം ഉയർന്നുതാഴുന്നതിന് 38 മിനിറ്റെടുക്കും. ഒരേസമയം 1750 പേർക്ക് ഇതിലിരുന്ന് കാഴ്ചകൾ കാണാം. 10 രാജ്യങ്ങളിൽ നിന്നുള്ള എഞ്ജിനീയറിംഗ് വൈദഗ്ധ്യം നിർമ്മാണത്തിനായി ഉപയോഗപ്പെടുത്തിയിട്ടുണ്ട്. 11,200 ടൺ ഉരുക്കുകൊണ്ടാണ് നിർമ്മാണം.
ലോകത്തിലെ ഏറ്റവും വലിയ രണ്ട് ക്രെയിനുകളാണ് ചക്രകാലുകൾക്ക് കരുത്തുപകരുന്നു. രാജ്യത്തെത്തുന്ന സന്ദർശകർക്ക് വേറിട്ട അനുഭവം സമ്മാനിക്കുന്നതായിരിക്കും അത്യാധുനിക സൗകര്യങ്ങളോട് കൂടിയ ചക്രമെന്ന് ഉദ്ഘാടനം നിർവ്വഹിച്ചുകൊണ്ട് മീഡിയ ചെയർമാൻ ശൈഖ് അഹമ്മദ് ബിൻ മുഹമ്മദ് ബിൻ റാഷിദ് അൽ മഖ്തും പറഞ്ഞു.
ഐൻ ദുബൈയിയുടെ മുകളിരുന്ന് ചായകുടിക്കുന്ന വീഡിയോ കിരീടാവകാശി ശൈഖ് ഹംദാൻ ബിൻ മുഹമ്മദ് ബിൻ റാഷിദ് ട്വിറ്ററിൽ പോസ്റ്റുചെയ്തു. വീഡിയോ സാമൂഹ്യ മാദ്ധ്യമങ്ങളിൽ വൈറലായതോടെ നിരവധി പേർ ദുബൈയിയുടെ വിശേഷങ്ങൾ അന്വേഷിക്കുകയാണ്.
