കോട്ടയം: കേരളത്തിലെ പ്രളയബാധിതർക്ക് ആശ്വാസമായി കർണാടക ബിജെപി. ദുരിതാശ്വാസ സാമഗ്രികളുമായി കർണാടകയിൽ നിന്നും ആദ്യഘട്ട ട്രക്കുകൾ കേരളത്തിലെത്തി. സംസ്ഥാന ജനറൽ സെക്രട്ടറി പി.സുധീർ കോട്ടയത്ത് വെച്ച് വാഹനങ്ങൾ സ്വീകരിച്ചു. തുടർന്ന് വിവിധ പ്രദേശങ്ങളിലേക്കുള്ള ലോഡുകൾ അദ്ദേഹം ഫ്ളാഗ് ഓഫ് ചെയ്തു.
ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ മഴക്കെടുതിയുടെ ദുരിതങ്ങൾ അനുഭവിക്കുന്നവരുടെ ക്യാമ്പുകൾ സന്ദർശിച്ചിരുന്നു. ദുരിതാശ്വാസ പ്രവർത്തനങ്ങളിലെ സർക്കാർ സംവിധാനങ്ങളുടെ പരാജയം നേരിട്ട് ബോധ്യപ്പെട്ടതിനെ തുടർന്ന് ബിജെപി കേന്ദ്ര നേതൃത്വത്തിന്റെ സഹായം തേടുകയായിരുന്നു. കേന്ദ്ര നേതൃത്വത്തിന്റെ നിർദ്ദേശാനുസരണമാണ് കർണാടക നേതൃത്വം ദുരിതാശ്വാസ സാമഗ്രികൾ സംഭരിച്ച് അടിയന്തിരമായി നൽകിയത്.
വരും ദിവസങ്ങളിൽ കർണാടകത്തിൽ നിന്നും കൂടുതൽ ട്രക്കുകൾ കേരളത്തിലേക്ക് എത്തുമെന്ന് ബിജെപി നേതൃത്വം വ്യക്തമാക്കി. ദുരിതാശ്വാസ പ്രവർത്തനങ്ങളിൽ സംസ്ഥാന സർക്കാർ പൂർണ പരാജയമാണെന്ന ആക്ഷേപത്തിനിടെയാണ് ബിജെപി നേതൃത്വം സഹായങ്ങൾ ഒരുക്കി രംഗത്തെത്തിയത്. ദുരിതബാധിതർക്ക് വേണ്ട അവശ്യസാധനങ്ങളും വസ്ത്രങ്ങളുമാണ് ആദ്യഘട്ടത്തിൽ ഉൾപ്പെടുത്തിയിരിക്കുന്നത്. മരുന്ന്, കുടിവെള്ളം, പുതപ്പുകൾ, വസ്ത്രങ്ങൾ, വീട്ടുപകരണങ്ങൾ, കുട്ടികൾക്കുള്ള ഭക്ഷ്യവസ്തുക്കൾ, പഠനോപകരണങ്ങൾ, അടുക്കളസാമഗ്രികൾ തുടങ്ങിയവയും ഇക്കൂട്ടത്തിലുണ്ട്.
