ദുബായ്: ടി-20 ലോകകപ്പിലെ ഇന്ത്യ പാകിസ്താൻ മത്സരത്തിനുശേഷമുള്ള പത്രസമ്മേളനത്തിൽ പാക് മാദ്ധ്യമപ്രപർത്തകന് വായടപ്പിക്കുന്ന മറുപടി നൽകി ഇന്ത്യൻ ക്യാപ്റ്റൻ വിരാട് കോഹ്ലി. ടീമിലെ ഓപ്പണറും വൈസ് ക്യാപ്റ്റനുമായ രോഹിത് ശർമ്മയെ ഒഴിവാക്കി പകരം ഇഷാൻ കിഷനെ ഉൾപ്പെടുത്തുമോ എന്ന ചോദ്യത്തിനാണ് കോഹ്ലി ചുട്ട മറുപടി നൽകിയത്.
പാകിസ്താനെതിരെയുള്ള പോരാട്ടത്തിൽ 10 വിക്കറ്റിന് ആയിരുന്നു ഇന്ത്യയുടെ തോൽവി. മത്സരത്തിൽ ആദ്യ പന്തിൽ തന്നെ രോഹിത് പുറത്തായിരുന്നു. ഈ പ്രകടനത്തെ കുറിച്ച് അഭിപ്രായപ്പെട്ടുകൊണ്ടായിരുന്നു പാക് മാദ്ധ്യപ്രവർത്തകന്റെ ചോദ്യം. ‘സന്നാഹ മത്സരത്തിൽ ഇഷാൻ കിഷൻ മികച്ച പ്രകടനം നടത്തിയിരുന്നു. ഈ സാഹചര്യത്തിൽ രോഹിതിനെ പുറത്താക്കി പകരം ഇഷാന് അവസരം നൽകുന്നത് പരിഗണിക്കുമോ?’എന്നാണ് പാക് മാദ്ധ്യമപ്രവർത്തകൻ ചോദിച്ചത്. പിന്നാലെ തന്നെ കോഹ്ലി മാദ്ധ്യമപ്രവർത്തകന്റെ വായടപ്പിച്ച് കൊണ്ട് മറുപടി നൽകി.
"Will you drop Rohit Sharma from T20Is?" 🤔@imVkohli had no time for this question following #India's loss to #Pakistan.#INDvPAK #T20WorldCup pic.twitter.com/sLbrq7z2PW
— ICC (@ICC) October 25, 2021
‘ഏറ്റവും മികച്ച ടീമിനെയാണ് ഞാൻ നയിക്കുന്നത്. സന്നാഹ മത്സരങ്ങളിൽ രോഹിത് കാഴ്ചവെച്ച പ്രകടനം നിങ്ങൾ കണ്ടതല്ലേ? അത്തരത്തിലുള്ള കളിക്കാരനെ ടീമിൽ നിന്നും ഒഴിവാക്കാൻ പറയുന്നത് കൊണ്ട് എന്താണ് താങ്കൾ ഉദ്ദേശിക്കുന്നത്. നിങ്ങളാണ് എന്റെ സ്ഥാനത്തെങ്കിൽ രോഹിത്തിനെ ഒഴിവാക്കുമോ? നിങ്ങൾ വിവാദങ്ങളാണ് ആഗ്രഹിക്കുന്നതെങ്കിൽ ദയവായി എന്നോട് പറയൂ. അതിന് അനുസരിച്ച് ഞാൻ ഉത്തരം നൽകാം’ വീരാട് കോഹ്ലി മറുപടി നൽകി.
രോഹിത് ശർമ്മയും വിരാട് കോഹ്ലിയും തമ്മിൽ അഭിപ്രായവ്യത്യാസങ്ങൾ ഉണ്ടെന്ന വാർത്ത പ്രചരിച്ചിരുന്നു. ഇതിന്റെ അടിസ്ഥാനത്തിലാണ് പാക് മാദ്ധ്യമപ്രവർത്തകൻ ഇത്തരത്തിൽ ഒരു ചോദ്യം ഉന്നയിച്ചത്.
