ഇഷ്ടപ്പെട്ട പഴ വർഗങ്ങളെല്ലാം ഒറ്റമരത്തിൽ കായ്ച്ചാലോ. സംഗതി കൊള്ളാം എന്നായിരിക്കും പലരും ചിന്തിക്കുക. ഇതൊക്കെ കഥകളിലും കാർട്ടൂണുകളിലുമൊക്കെയല്ലേ സാദ്ധ്യമാകൂ എന്ന് ചിന്തിക്കുന്നവരാകും ഏറെ. എന്നാൽ ഇത്തരത്തിലുള്ള സങ്കൽപ്പങ്ങളെ യാഥാർത്ഥ്യമാക്കുകയാണ് ന്യൂയോർക്കിലെ ഒരു കർഷക ഗവേഷകൻ. വേറിട്ട ഇനത്തിൽപ്പെട്ട നിരവധി പഴ വർഗങ്ങൾ കായ്ക്കുന്ന ഒരു മരം വികസിപ്പിച്ചെടുത്ത് സാം വാൻ അകെൻ ലോകത്തെ അമ്പരപ്പിച്ചിരിക്കുകയാണ്.
ട്രീ ഓഫ് 40 എന്നാണ് ഈ മരത്തിന് നൽകിയിരിക്കുന്ന പേര്. പേര് സൂചിപ്പിക്കുന്നത് പോലെ തന്നെ ഈ ഒരു മരത്തിൽ 40 ഇനത്തിൽപ്പെട്ട പഴവർഗങ്ങൾ കായ്‌ക്കുന്നു. സിറാക്കൂസ് യൂണിവേഴ്‌സിറ്റിയിലെ വിഷ്വൽ ആർട്‌സ് അസോസിയേറ്റ് പ്രൊഫസറും കർഷകനുമായ സാം വാൻ അകെൻ ആണ് ഇത്തരത്തിൽ വേറിട്ടൊരു മരം വികസിപ്പിച്ചെടുത്തിരിക്കുന്നത്.
2008-മുതൽ ആരംഭിച്ചതാണ് ട്രീ ഓഫ് 40 എന്ന മരത്തിന്റെ പദ്ധതി. പ്രത്യേക രീതിയിൽ ഗ്രാഫ്റ്റിങ്ങിലൂടെയാണ് ഇങ്ങനെയാരു മരം പ്രൊഫസർ സാം വികസിപ്പിച്ചെടുത്തത്. കട്ടിയുള്ള പഴങ്ങളുടെ കുരുക്കൾ ഒരുമിച്ച് ചേർത്താണ് ഗ്രാഫ്റ്റിങ് നടത്തുക. ഏകദേശം ഒൻപത് വർഷങ്ങളെടുത്തു ഈ മരം കായ്‌ക്കാൻ. പിന്നീട് മറ്റ് മരം നടുകയും ശൈത്യകാലത്ത് അതിൽ ട്രീ ഓഫ് 40-ന്റെ ശാഖ ഗ്രാഫ്റ്റ് ചെയ്യുകയും ചെയ്തു.
പല വിധത്തിലുള്ള പഴങ്ങൾ കായ്‌ക്കുമെങ്കിലും ഓരോ ഇനങ്ങളും വേറിട്ട സമയങ്ങളിലാണ് ഫലം പുറപ്പെടുവിയ്‌ക്കുന്നത്. ബദാം, ചെറി, ആപ്രിക്കോട്ട്, പീച്ച് തുടങ്ങിയ പഴ വർഗങ്ങളെല്ലാം തന്നെയുണ്ട് ഉണ്ട് ട്രീ ഓഫ് 40 എന്ന മരത്തിൽ. ചെറുപ്പം മുതൽക്കേ കൃഷിയോട് താൽപര്യമുണ്ടായിരുന്ന വ്യക്തിയാണ് പ്രൊഫസർ സാം. അതുകൊണ്ടുതന്നെയാണ് കൃഷിയിൽ അദ്ദേഹം വേറിട്ട പരീക്ഷണം നടത്തിയതും. ആ പരീക്ഷണം വിജയിക്കുകയും ചെയ്തു.
2014 ലെ കണക്കനുസരിച്ച്, കമ്മ്യൂണിറ്റി ഗാർഡനുകൾ, മ്യൂസിയങ്ങൾ, തുടങ്ങിയ സ്വകാര്യ, പൊതു സ്ഥലങ്ങളിൽ ഇത്തരത്തിലുള്ള 16 മരങ്ങൾ വാൻ നിർമ്മിച്ച് നൽകിയിട്ടുണ്ട്. ഒരു വർഷത്തിൽ കൂടുതൽ സമയത്തും ഈ മരം മറ്റു മരങ്ങളെ പോലെ സാധാരണയായി കാണപ്പെടും. എന്നാൽ വസന്തത്തിന്റെ വരവോടെ വ്യത്യസ്ഥ പൂവുകൾ ഒരേ മരത്തിൽ പ്രത്യക്ഷപ്പെടുകയും ഇവ പിന്നീട് പഴമായി മാറുകയും ചെയ്യുന്നു.
സംഗതി വിജയം കണ്ടതോടെ ലോകത്തിന്റെ നാനാ ഭാഗത്തിനിന്നും നിരവധി പേർ സാം വാനിനെ പ്രശംസിച്ച് രംഗത്തെത്തുകയാണ്. തോട്ടം സന്ദർശിക്കാനും കൃഷി രീതികളെകുറിച്ച് മനസ്സിലാക്കാനും നിരവധി പേർ എത്തുന്നുണ്ട്. എത്തുന്ന എല്ലാ സന്ദർശകർക്കും സാം വാൻ നേരിട്ട് തന്നെയാണ് കാര്യങ്ങൾ വിശദീകരിച്ച് നൽകുന്നത്. സാമൂഹ്യ മാദ്ധ്യമങ്ങളിലും തരംഗാമാണ് ഇപ്പോൾ സാമിന്റെ ന്യൂനത കൃഷി രീതി.
