കൊച്ചി: കഴിഞ്ഞ വർഷം മലയാളികളുടെ പ്രിയ യുവതാരങ്ങളിൽ ഒരാളായ നീരജ് മാധവ് പുറത്തിറക്കിയ പണിപാളി എന്ന ഹാലോവീൻ റാപ് ഏറെ ശ്രദ്ധ പിടിച്ചു പറ്റിയിരുന്നു. ‘ആയ്യായ്യോ… പണി പാളീലോ… രാരീരാരം പാടിയുറക്കാൻ ആരും ഇല്ലല്ലോ’ എന്ന് തുടങ്ങുന്ന ഗാനം സമൂഹമാദ്ധ്യമങ്ങളിൽ ഏറെ തരംഗം സൃഷ്ടിച്ച ഒന്നായിരുന്നു. ഇപ്പോൾ ഇതാ പാട്ടിന്റെ രണ്ടാം ഭാഗത്തിന്റെ പണിപ്പുരയിലാണ് താരം. പണിപാളിയുടെ രണ്ടാം ഭാഗത്തിന്റെ ടീസർ പുറത്ത് വിട്ടാണ് നീരജ് രണ്ടാം വരവിനെ കുറിച്ച് അറിയിച്ചത്.
നൃത്തത്തിലും അഭിനയത്തിലും തന്റെതായ വ്യക്തിമുദ്ര പതിപ്പിച്ച കലാകാരനാണ് നീരജ്. പണിപാളിയുടെ റിലീസിന് ശേഷം പാട്ടെഴുത്തും തനിക്ക് വഴങ്ങുമെന്ന് താരം തെളിയിച്ചിരുന്നു. നീരജ് തന്നെ വരികൾ എഴുതി ആലപിച്ച പണിപാളിയെന്ന റാപ്പ് ഗാനത്തിന്റെ മാസ്റ്ററിംഗ് നിർവഹിച്ചത് റിബിൻ റിച്ചാർഡാണ്.
കഴിഞ്ഞ വർഷമാണ് നീരജ് പണിപാളിയുടെ ആദ്യ ഭാഗവുമായി എത്തിയത്. പാട്ട് കേരളത്തിൽ വൻ തരംഗം സൃഷ്ടിച്ചിരുന്നു. കൂടാതെ പുറത്തിറങ്ങി ചുരുങ്ങിയ ദിവസങ്ങൾക്കുള്ളിൽ തന്നെ കോടിയിലേറെ ആസ്വാദകരെ ഈ ഗാനം നേടിയിരുന്നു.
