ഗുവാഹത്തി : ബ്രഹ്മപുത്രയ്ക്ക് കുറുകേ കൂടുതൽ പാലങ്ങൾ നിർമ്മിക്കുമെന്ന് അസം മുഖ്യമന്ത്രി ഹിമന്ത ബിശ്വശർമ്മ. അടുത്ത അഞ്ച് വർഷത്തിനുള്ളിൽ നദിയ്‌ക്ക് കുറുകെ മൂന്ന് പാലങ്ങൾ കൂടി നിർമ്മിക്കും. ഇതോടെ തെക്കൻ, വടക്കൻ നദീതീരങ്ങളിൽ താമസിക്കുന്നവർക്ക് എളുപ്പത്തിൽ ബന്ധപ്പെടാനാകുമെന്നും അദ്ദേഹം പറഞ്ഞു. ജിഎസ് റോഡിൽ പുതുതായി നിർമ്മിച്ച പുതിയ സൂപ്പർമാർക്കറ്റിലെ ഫ്‌ളൈ ഓവർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
നിലവിലെ പാലത്തിന് പുറമേയാണ് മൂന്ന് എണ്ണം കൂടി നിർമ്മിക്കുന്നത്. നരേഗി- കുരുവ, ഗുവാഹത്തി- വടക്കൻ ഗുവാഹത്തി, പലഷ്ഭരി- സുൽകുച്ചി എന്നീ സ്ഥലങ്ങളെ ബന്ധിപ്പിച്ചുകൊണ്ടാകും പുതിയ പാലങ്ങൾ നിർമ്മിക്കുക. ഈ പാലങ്ങളാകും ബ്രഹ്മപുത്ര നദിയുടെ ഇരുകരകളിലുമുള്ളവരെ പരസ്പരം ബന്ധിപ്പിക്കുകയെന്നും ഹിമന്ത വ്യക്തമാക്കി.
ദേശീയപാതയുമായി ബന്ധിപ്പിക്കുന്ന ബെഹാന്ത- സിപാജഹർ, കുരുവ- നരേംഗി ആറ് വരി റിംഗ് റോഡിന്റെ നിർമ്മാണ പ്രവർത്തനങ്ങൾ സംസ്ഥാന സർക്കാർ വിലയിരുത്തിവരികയാണ്. വളരെ ചുരുങ്ങിയ സമയം കൊണ്ടാണ് ഫ്‌ളൈ ഓവറിന്റെ നിർമ്മാണ പ്രവർത്തനങ്ങൾ പൂർത്തിയാക്കിയത്. ഇത് സംസ്ഥാനത്ത് നടക്കുന്ന വികസന പ്രവർത്തനങ്ങളുടെ വേഗത്തെയാണ് സൂചിപ്പിക്കുന്നതെന്നും അദ്ദേഹം കൂട്ടിച്ചേർത്തു.
നിലവിൽ നിർമ്മാണം പുരോഗമിക്കുന്ന ഗുവാഹത്തി- വടക്കൻ ഗുവാഹത്തി പാലത്തിന്റെ നിർമാണ പ്രവർത്തനങ്ങൾ 2023 ഓടെ പൂർത്തിയാകും. ഈ സാമ്പത്തിക വർഷത്തോടെ എയിംസിന്റെ നിർമ്മാണവും പൂർത്തിയാകും. നിലവിൽ നിർമ്മാണം പുരോഗമിക്കുന്ന സരബ് ഭതി, മലിഗാവ് ഫ്‌ളൈ ഓവറുകളും 2023 ഓടെ ഉദ്ഘാടനത്തിന് ഒരുങ്ങുമെന്നും അദ്ദേഹം വിശദീകരിച്ചു.
