ഗാന്ധിനഗർ: ദീപാവലിയോടനുബന്ധിച്ച് ജീവനക്കാർക്ക് ഇലക്ട്രിക് സ്‌കൂട്ടറുകൾ സമ്മാനമായി നൽകി ഗുജറാത്തിലെ സൂറത്ത് ആസ്ഥാനമായി പ്രവർത്തിക്കുന്ന കമ്പനി. പരിസ്ഥിതി സംരക്ഷണത്തിനും ഇന്ധനക്ഷാമം കുറയ്‌ക്കാനുമാണ് നിർമ്മാതാക്കൾ ഇത്തരത്തിൽ ഒരു തീരുമാനമെടുത്തത്. അലയൻസ് ഗ്രൂപ്പ് എന്ന കമ്പനിയാണ് വേറിട്ട സമ്മാനം ജീവനക്കാർക്ക് നൽകിയത്.
‘പെട്രോൾ ഡീസൽ തുടങ്ങിയ ഇന്ധനങ്ങളിൽ നിന്നുള്ള മലിന വായു അന്തരീക്ഷത്തിന് ഹാനികരമാണ്. മാത്രമല്ല ഇത്തരത്തിൽ അമിത ഉപയോഗം മൂലം ജനങ്ങൾ ഭാവിയിൽ ഇന്ധനക്ഷാമം നേരിടേണ്ടി വരും. ഇത് മുന്നിൽ കണ്ടാണ് ഞങ്ങളുടെ ജീവനക്കാർക്ക് ദീപാവലി സമ്മാനമായി ഇലക്ട്രിക് സ്‌കൂട്ടറുകൾ നൽകാൻ തീരുമാനിച്ചത്’ കമ്പനി ഡയറക്ടർ സുഭാഷ് ദാവർ പറഞ്ഞു.
ഇലക്ട്രിക് സ്‌കൂട്ടറുകളുടെ ഉപയോഗത്തിലൂടെ ജീവനക്കാർക്ക് അവരുടെ വരുമാനം സൂക്ഷിച്ച് ചിലവക്കാൻ സാധിക്കും. വാഹനങ്ങളിൽ ഇന്ധനം നിറക്കുന്നതിന്റെ പകുതി ചിലവ് മാത്രമേ ഇലക്ട്രിക് വാഹനത്തിനാവശ്യമുള്ളൂ എന്നും അദ്ദേഹം കൂട്ടിച്ചേർത്തു.
കമ്പനിയിലെ 35 ജീവനക്കാർക്കാണ് ദീപാവലി ദിനത്തിൽ ഇലക്ട്രിക് സ്‌കൂട്ടറുകൾ സമ്മാനിച്ചത്. ജീവനക്കാർക്ക് ഉപകാരപ്പെടുന്ന സമ്മാനം നൽകണമെന്നും അവ പ്രകൃതിക്ക് ദോഷം വരുത്താത്തതാവണമെന്നും കമ്പനിയ്‌ക്ക് നിർബന്ധമായിരുന്നുവെന്ന് സുഭാഷ് ദാവറിന്റെ മകൻ ചിരാഗ് പറഞ്ഞു.
