കൊതിക്ക് വയസില്ല എന്ന് പറയുന്നത് പോലെ.. ചോക്ലേറ്റ് പ്രേമത്തിനും പ്രായഭേദമില്ല.. നിങ്ങളുടെ സമൂഹിക പദവിയോ സമ്പത്തോ വയസോ നാടോ അങ്ങനെയൊരു ഘടകത്തിനും ചോക്ലേറ്റിനോടുള്ള നിങ്ങളുടെ ഇഷ്ടത്തെ തല്ലികെടുത്താനാകില്ല.. ചുരുക്കം ചിലരൊഴികെ ഈ ഭൂമിയിലെ സകല മനുഷ്യരും ചോക്ലേറ്റ് പ്രേമികളാണെന്ന് തന്നെ പറയേണ്ടി വരും.. ചോക്ലേറ്റ് കഴിക്കുമ്പോൾ നിങ്ങളുടെ തലച്ചോറിൽ സന്തോഷമുണ്ടാക്കുന്ന രാസപ്രവർത്തനം നടക്കുന്നുണ്ടെന്നത് ഇതിന് കാരണമാണെന്ന് പറയപ്പെടുന്നു..
ലോകമെമ്പാടുമുള്ള ചോക്ലേറ്റ് ആരാധകരുടെ പ്രിയപ്പെട്ട ചില ചോക്ലേറ്റ് ബ്രാൻഡുകളെ നമുക്ക് പരിചയപ്പെടാം..
ഫെരേറോ റോഷർ
ലോകത്തിൽ ഏറ്റവും അധികം വിപണി കീഴടക്കിയ ചോക്ലേറ്റ് ബ്രാൻഡുകളിലൊന്നാണ് ഫെരേറോ റോഷർ. പ്രതിവർഷം ദശലക്ഷക്കണിക്കിന് ആളുകൾ ഇത് വാങ്ങുന്നുണ്ടെന്നാണ് കണക്ക്. ചോക്ലേറ്റ് ഉൽപാദനത്തിൽ 200 വർഷത്തിലധികം പാരമ്പര്യമുള്ള കമ്പനിയാണിത്. സ്വർണ നിറമുള്ള കടലാസിൽ പൊതിഞ്ഞ ഫെരേറോ റോഷർ സമ്മാനമായി കൊടുക്കുന്നവരും അനവധിയാണ്. ഹേസൽനട്ടും മിൽക്ക് ചോക്ലേറ്റുമാണ് ഫെരേറോയെ വ്യത്യസ്തമാക്കുന്നത്.
ലിൻറ്റ്
സ്വിറ്റ്സർലാൻഡിൽ 1845ൽ പിറവിയെടുത്ത വിലയേറിയ ചോക്ലേറ്റാണ് ലിൻറ്റ്. ലോകത്തിലെ തന്നെ ഏറ്റവും ജനപ്രിയമായ വൈറ്റ് ചോക്ലേറ്റ് നിർമിക്കുന്നത് ലിൻറ്റാണെന്ന് പറയപ്പെടുന്നു. 11 തരത്തിലധികം ലിൻറ്റ് ചോക്ലേറ്റുകൾ ഇന്ന് ലഭ്യമാണ്. ഇതിൽ ഏറ്റവും അധികം ആരാധകരുള്ളത് ലിൻറ്റിന്റെ ട്രഫിൾ വേർഷനാണ്.
ഹെർഷീസ്
വൈവിധ്യങ്ങൾ നിറഞ്ഞ നിരവധി ചോക്ലേറ്റുകൾ ഉത്പാദിപ്പിക്കുന്നവരാണ് ഹെർഷീസ്. ഹെർഷീസ് കിസ്സസ്, ചോക്ലേറ്റ് ബാർസ്, വോപ്പേഴ്സ് തുടങ്ങി കൈനിറയെ വിവിധ പ്രൊഡക്ടുകൾ ഹെർഷീസ് ആരാധകർ സ്വന്തമാക്കാറുണ്ട്. ഫിലാഡൽഫിയയിൽ 1873ലാണ് ഹെർഷീസിന്റെ തുടക്കം.
ടോബ്ലറോൺ
മറ്റൊരു ജനപ്രിയ ചോക്ലേറ്റ് ബ്രാൻഡാണ് ടോബ്ലറോൺ. പാക്കേജിങ്ങിലും ലോഗോയിലും വ്യത്യസ്തത പുലർത്തുന്ന ടോബ്ലറോണിന് കോടിക്കണക്കിന് ആരാധകരുണ്ടെന്നാണ് കണക്ക്. ചോക്ലേറ്റിന്റെ പിരമിഡ് ആകൃതിയാണ് മറ്റൊരു പ്രത്യേകതയാണ്. സ്വിറ്റ്സർസാൻഡാണ് ടോബ്ലറോണിന്റെയും ജന്മനാട്.
കാഡ്ബറി
സാധാരണക്കാരുടെ ഇടയിലും വിപണി കീഴടക്കി, ലോകമെമ്പാടും ആരാധകരുള്ള ചോക്ലേറ്റ് ബ്രാൻഡാണ് കാഡ്ബറി. ലോകത്തിന്റെ മുക്കിലും മൂലയിലും കാഡ്ബറിക്ക് ആവശ്യക്കാരുണ്ടെന്നതാണ് പ്രത്യേകത. ഒരുപക്ഷേ ഏറ്റവും അധികം ചോക്ലേറ്റ് പ്രോഡക്ടുകൾ വിതരണം ചെയ്യുന്നതും കാഡ്ബറീസായിരിക്കും. ഇതിൽ തന്നെ ഇന്ത്യയിൽ നല്ലവണ്ണം പ്രചാരം നേടിയ കാഡ്ബറി ചോക്ലേറ്റ് ഡയറിമിൽക്ക് ആണെന്നതിലും തർക്കമില്ല..
ഗില്യാൻ
ബെൽജിയൻ ചോക്ലേറ്റായ ഗില്യാന് നാൽപതിലധികം രാജ്യങ്ങളിൽ വിപണിയുണ്ട്. വായിലിട്ടാൽ അലിഞ്ഞുപോകുമെന്ന് പറയുന്നത് അക്ഷരാർത്ഥത്തിൽ യാഥാർത്ഥ്യമാക്കിയ ചോക്ലേറ്റാണിത്. കടൽചിപ്പിയുടെ ശംഖിന്റെയും കടൽകുതിരയുടെയുമെല്ലാം രൂപത്തിൽ തയ്യാറാക്കുന്ന ഗില്യണിന്റെ 250 ഗ്രാം ചോക്ലേറ്റിന് രണ്ടായിരത്തോളം രൂപയാണ് വില.
പാച്ചി
മിഡിൽ ഈസ്റ്റ് രാജ്യങ്ങളിൽ കൂടുതൽ ജനപ്രിയമായ പാച്ചി സിസ്-ബെൽജിയൻ രാജ്യങ്ങളുടെ ചോക്ലേറ്റ് മിശ്രിതമാണ്. ലെബനൻ ആസ്ഥാനമായി പ്രവർത്തിക്കുന്ന പാച്ചിയുടെ കമ്പനി 1970കളിലാണ് രൂപമെടുത്തത്. പ്രീമിയം ഉത്പന്നങ്ങൾ ചേർത്തുണ്ടാക്കുന്ന പാച്ചി ചോക്ലേറ്റ് ലക്ഷുറി ബ്രാൻഡായാണ് കണക്കാക്കുന്നത്. ഗിഫ്റ്റ് രൂപത്തിലുള്ള ഇതിന്റെ പാക്കിങ്ങാണ് പ്രത്യേകത. ചീസ്-കേക്ക്, പീനട്ട് ബട്ടർ, കോട്ടൺ കാൻഡി എന്നീ ഫ്ലേവറുകളിൽ വരുന്ന പാച്ചിയിൽ ഹേസൽനട്ടും പിസ്തയും ബദാമുമെല്ലാം പ്രധാന ചേരുവകളാണ്. 500 ഗ്രാം പാച്ചി ചോക്ലേറ്റിന് ഏഴായിരത്തോളം രൂപയാണ് വില..
നെസ്ലേ..
ബ്രേക്കെടുക്കാൻ പറയുന്ന കിറ്റ്കേറ്റും ക്രഞ്ച് മഹാൻ മഞ്ചും പാൽ ചോക്ലേറ്റായ മിൽക്കി ബാറുമെല്ലാം ചേർന്ന് സന്തോഷിപ്പിച്ച നമ്മുടെ കുട്ടിക്കാലം ഒരു ഫെരേറോ റോഷറിനും നൽകാൻ ചിലപ്പോൾ കഴിഞ്ഞിട്ടുണ്ടാകില്ല. ഇന്ത്യയിൽ അത്രയേറെ പ്രശസ്തമായ ചോക്ലേറ്റ് ബ്രാൻഡാണ് നെസ്ലേ.. ഒരിക്കലെങ്കിലും ഒരു നെസ്ലേ ചോക്ലേറ്റ് കഴിക്കാത്തവർ വിരളമായിരിക്കുമെന്നതാണ് പ്രത്യേകത. ചോക്ലേറ്റിനപ്പുറത്തേക്ക് നിരവധി പ്രോഡക്ടുകളും നെസ്ലേക്കുണ്ട്.
മാഴ്സ്
വിശന്നാൽ നിങ്ങൾ നിങ്ങളല്ലാതാകുമെങ്കിൽ കഴിക്കാൻ ആവശ്യപ്പെടുന്ന സ്നിക്കേഴ്സ് ഇഷ്ടപ്പെടാത്തവർ ചുരുക്കമാണ്. സ്നിക്കേഴ്സ് കൂടാതെ ട്വിക്സും ഗാലക്സിയും മിൽക്കിവേയുമെല്ലാം മാഴ്സ് കമ്പനിയുടെ തന്നെ ചോക്ലേറ്റാണ്. ഏതാനും വർഷങ്ങൾക്ക് മുമ്പാണ് ഇന്ത്യയിലും മാഴ്സ് പ്രചാരം നേടുന്നത്. ലോകത്ത് 73ലധികം രാജ്യങ്ങളിൽ മാഴ്സ് ചോക്ലേറ്റുകൾക്ക് ആരാധകരുണ്ട്.
മുന്നിലേക്ക് വെച്ചുനീട്ടിയാൽ വേണ്ടെന്ന് പറയാൻ സാധിക്കാത്ത വസ്തുക്കളിലൊന്നാണ് ചോക്ലേറ്റ്. മധുരം കഴിച്ചാൽ വണ്ണം വെയ്ക്കുമെന്ന് ഭയപ്പെട്ട് വേദനയോടെ ചോക്ലേറ്റ് വേണ്ടെന്നുവയക്കുന്നവർക്ക് ഡാർക്ക് ചോക്ലേറ്റെന്ന ഓപ്ഷനും ഇന്നുണ്ട്. മധുരം കുറവാണെങ്കിവും ഡാർക്ക് ചോക്ലേറ്റിന് ആരാധകരേറെയാണ്. ഡാർക്ക് ചോക്ലേറ്റ് ശീലമാക്കുന്നത് ആരോഗ്യത്തിനും നല്ലതാണെന്ന് പഠനങ്ങൾ തെളിയിച്ചിട്ടുണ്ട്.
Comments