മുംബൈ: മാരുതി സുസുകിയുടെ ജനപ്രിയ മോഡലുകളിൽ ഒന്നാണ് എർട്ടിഗ എംപിവി. ഇപ്പോഴിതാ ജനപ്രിയ മോഡലിന്റെ ഫെയ്സ് ലിഫിറ്റ് പതിപ്പ് അവതരിപ്പിക്കാൻ ഒരുങ്ങുകയാണ് നിർമ്മാതാക്കൾ. മാരുതി സുസുകി എർട്ടിഗ സ്പോർട്ട് എഡിഷന്റെ ടീസർ നിർമ്മാതാക്കൾ ഇന്തോനേഷ്യയിലാണ് അവതരിപ്പിച്ചിരിക്കുന്നത്.
അടുത്തയാഴ്ച നടക്കാനിരിക്കുന്ന ഗൈകിൻഡോ ഇന്തോനേഷ്യ ഇന്റർനാഷണൽ ഓട്ടോ ഷോയിൽ(ജിഐഐഎഎസ്) എർട്ടിഗ സ്പോർട്ട് എഡിഷൻ രംഗപ്രവേശനം നടത്തുമെന്നാണ് കണക്കുകൂട്ടുന്നത്. എർട്ടിഗയുടെ ലിമിറ്റഡ് എഡിഷൻ മോഡലിന്റെ 125 യൂണിറ്റുകൾ മാത്രമായിരിക്കും വിപണിയിലെത്തുക എന്നാണ് സുസുകി ഇന്തോനേഷ്യ പറയുന്നത്.
ജിഐഐഎഎസിൽ സുസുകി ഒരു ഫാമിലി കാറോ, അല്ലെങ്കിൽ എംപിവിയോ അവതരിപ്പിക്കുമെന്ന് അറിയിച്ചിരുന്നു. രണ്ട് കാറുകൾ അവതരിപ്പിക്കാനാണ് നിർമ്മാതാക്കൾ പദ്ധതിയിട്ടിരുന്നത്. അതിൽ ഒന്നാണ് എർട്ടിഗ. സുസുകി കുടുംബത്തിന്റെ പ്രൗഢിയ്ക്ക് അനുയോജ്യമായ വാഹനമാണ് എർട്ടിഗ സ്പോർട്ട് എഡിഷൻ എന്നാണ് നിർമ്മാതാക്കൾ അഭിപ്രായപ്പെടുന്നത്.
മുൻതലമുറ എർട്ടിഗയെ അടിസ്ഥാനമാക്കിയാണ് സ്പോർട്ട് എഡിഷൻ പുറത്തിറങ്ങുക. കറുത്ത റൂഫ്, കറുത്ത മിററുകൾ സൈഡ് സ്കർട്ടുകളിൽ സ്റ്റിക്കറുകൾ എന്നിവയും ഈ പ്രത്യേക പതിപ്പിൽ ഉൾപ്പെടുത്തിയിരിക്കുന്നു. എന്നാൽ ഇവയ്ക്ക് പുറമെ അകത്തളത്തിലാണ് സ്പോർട്ട് എഡിഷൻ വ്യത്യസ്തനാവാൻ പോകുന്നത്. സെമി-ലെതറിൽ ആവരണം ചെയ്ത ചുവന്ന തുന്നലോടുകൂടിയ സീറ്റുകളും നവീകരിച്ച സെന്റർ കൺസോളുമാണ് ഈ മോഡലിൽ ഉൾപ്പെടുത്തിയിരിക്കുന്ന ചില സവിശേഷതകൾ.
പഴയ മോഡലിലെക്കാൾ 130 മില്ലിമീറ്റർ അധികം വലുപ്പമാണ് എർട്ടിഗ സ്പോർട്ട് മോഡലിനുള്ളത്. കൂടാതെ അധിക ബൂട്ട് സ്പെയ്സും പ്രത്യേക പതിപ്പിൽ ലഭിക്കുന്നു. 40 ലിറ്ററാണ് വാഹനത്തിന് നൽകിയിട്ടുള്ള ബൂട്ട് സ്പെയ്സ്. പഴയ എർട്ടിഗയെക്കാൾ പിന്നിലിരിക്കുന്ന യാത്രക്കാർക്ക് കാലുകൾ വിസ്തരിച്ച് വെയ്ക്കാനുള്ള സൗകര്യവും മോഡലിലുണ്ട്.
ജിംനി എസ്യുവിക്ക് കരുത്ത് നൽകുന്ന 1.5 ലിറ്റർ നാല്-സിലിണ്ടർ കെ15ബി പെട്രോൾ എഞ്ചിൻ ആയിരിക്കും എർട്ടിഗ സ്പോർട്ട് ലിമിറ്റഡ് എഡിഷനും നൽകുക. ഈ എഞ്ചിൻ 6,000 ആർപിഎമ്മിൽ പരമാവധി 103.2 എച്ച്പി കരുത്തും 4,400 ആർപിഎമ്മിൽ 138 എൻഎം പീക്ക് ടോർക്കും ഉത്പാദിപ്പിക്കും. അഞ്ച് സ്പീഡ് മാനുവലിനൊപ്പം ഓട്ടോമാറ്റിക് ഗിയർബോക്സും വാഹനത്തിൽ ഉൾപ്പെടുത്തുമെന്നാണ് റിപ്പോർട്ടുകൾ പറയുന്നത്.
