കൊച്ചി : മിസ്കേരളയും, മിസ്കേരളാ റണ്ണറപ്പും മരിക്കാനിടയായ വാഹനാപടത്തിൽ അറസ്റ്റ്. സംഭവത്തിൽ കാർ ഓടിച്ചിരുന്ന ഡ്രൈവറെ പോലീസ് അറസ്റ്റ് ചെയ്തു. തൃശ്ശൂർ സ്വദേശി അബ്ദുൾ റഹ്മാനെയാണ് അറസ്റ്റ് ചെയ്തത്. അശ്രദ്ധമായി വാഹനം ഓടിച്ച് അപകടം ഉണ്ടാക്കിയതിനാണ് ഡ്രൈവർക്കെതിരെ നടപടി.
അപകടത്തിൽ അബ്ദുൾ റഹ്മാനും ഗുരുതരമായി പരിക്കേറ്റിരുന്നു. തുടർന്ന് ആശുപത്രിയിൽ ചികിത്സയിലായിരുന്നു. ആശുപത്രിയിൽ നിന്നും ഡിസ്ചാർജ് ആയതിന് ശേഷമാണ് അബ്ദുൾ റഹ്മാന്റെ അറസ്റ്റ് രേഖപ്പെടുത്തിയത്.
നവംബർ ഒന്നിനായിരുന്നു പാലാരിവട്ടം ചക്കരപ്പറമ്പിന് സമീപം ദേശീയപാതയിൽ അപകടം ഉണ്ടായത്. രാത്രിയുണ്ടായ അപകടത്തിൽ മൂന്ന് പേരാണ് മരിച്ചത്. മിസ്കേരളയും ആറ്റിങ്ങൽ സ്വദേശിയുമായ അൻസി കബീർ (25), മിസ് കേരള റണ്ണറപ്പും തൃശ്ശൂർ സ്വദേശിയുമായ അജ്ഞന ഷാജൻ (24), തൃശ്ശൂർ സ്വദേശി കെ.എ മുഹമ്മദ് ആഷിഖ് (25) എന്നിവരായിരുന്നു മരിച്ചത്. ഇതിൽ അൻസിയും, അജ്ഞനയും സംഭവ സ്ഥലത്തും ആഷിഖ് ചികിത്സയിലിരിക്കെ ഇന്നലെ രാത്രിയുമായിരുന്നു മരിച്ചത്.
ബൈക്കുമായി കൂട്ടിയിടിക്കാതിരിക്കാൻ പെട്ടെന്നു വെട്ടിച്ചതോടെയാണ് അപകടമുണ്ടായത്. അപകടത്തിൽ കാർ പൂർണ്ണമായും തകർന്നിരുന്നു.
Comments