തിരുവന്തപുരം ; ആരാധക ലോകം ആവേശത്തോടെ കാത്തിരിക്കുന്ന ചിത്രമാണ് മോഹൻലാൽ പ്രിയദർശൻ കൂട്ടുകെട്ടിൽ നിർമ്മിച്ച ‘മരക്കാർ: അറബിക്കടലിന്റെ സിംഹം.’ ചിത്രീകരണം പൂർത്തിയായി രണ്ട് വർഷമായിട്ടും ചിത്രം പുറത്തിറക്കാൻ സാധിച്ചിരുന്നില്ല. കൊറോണ മഹാമാരി കാരണം റിലീസ് ഡേറ്റ് നീണ്ടുപോകുകയായിരുന്നു. തുടർന്ന് വിവാദങ്ങൾക്കും കാത്തിരിപ്പിനും ഒടുവിൽ ചിത്രം തിയേറ്ററിൽ തന്നെ റിലീസ് ചെയ്യുമെന്ന് മന്ത്രി സജി ചെറിയാനും അറിയിച്ചു.
ഇതിന് പിന്നാലെ മരക്കാറിന്റെ പുതിയ ടീസർ റിലീസ് ചെയ്തിരിക്കുകയാണ് ചിത്രത്തിന്റെ അണിയറ പ്രവർത്തകർ. സിനിമയുടെ റിലീസ് ഡേറ്റ് ഔദ്യോഗികമായി പ്രഖ്യാപിച്ചുകൊണ്ടാണ് ടീസർ പുറത്തിറക്കിയിരിക്കുന്നത്. ഡിസംബർ 2 ന് ചിത്രം റിലീസ് ആകും. ‘കുഞ്ഞാലി വരും.. അതെനിക്കേ പറയാൻ പറ്റൂള്ളു. കുഞ്ഞാലി വരും’ എന്ന് നിർമാതാവും ചിത്രത്തിലെ അഭിനേതാവും കൂടിയായ ആന്റണി പെരുമ്പാവൂർ പറയുന്നതാണ് ടീസർ.
ചിത്രത്തിന്റെ റിലീസുമായി ബന്ധപ്പെട്ട് ആന്റണി പെരുമ്പാവൂരും തിയറ്റർ ഉടമകളും തമ്മിലുണ്ടായ തർക്കം വലിയ വാർത്താപ്രാധാന്യം നേടിയിരുന്നു. അതുകൊണ്ടു തന്നെ ആന്റണി പെരുമ്പാവൂരിന്റെ ഡയലോഗിലുളള ടീസറും വേറിട്ട് നിൽക്കുന്നതായി.
മലായാളത്തിലെ ഏറ്റവും ചിലവേറിയ ചിത്രമാണ് മരക്കാർ. 100 കോടി രൂപയാണ് ബഡ്ജറ്റ്. വാഗമൺ, ഹൈദരാബാദ്, ബാദ്മി, രാമേശ്വരം എന്നിവിടങ്ങളിലാണ് ചിത്രീകരണം നടത്തിയത്. ആന്റണി പെരുമ്പാവൂരിന്റെ ആശിർവാദ് സിനിമാസിനൊപ്പം സന്തോഷ് ടി കുരുവിളയുടെ മുൺലൈറ്റ് എന്റർടെയിൻമെന്റും കോൺഫിഡന്റ് ഗ്രൂപ്പും ചേർന്നാണ് ചിത്രം നിർമ്മിക്കുന്നത്.
മരക്കാറിൽ മഞ്ജു വാര്യർ, പ്രഭു, പ്രണവ് മോഹൻലാൽ, കല്യാണി പ്രിയദർശൻ, ഫാസിൽ, അർജുൻ സർജ, കീർത്തി സുരേഷ്, തുടങ്ങി വമ്പൻ താരനിരയാണ് അണി നിരക്കുന്നത്. തിരുവാണ് ചിത്രത്തിന്റെ ഛായാഗ്രാഹകൻ. കലാസംവിധാനം നിർവഹിച്ചിരിക്കുന്നത് സാബു സിറിലാണ്.
