തിരുവനന്തപുരം : എംബിബിഎസ് ഡോക്ടർമാർക്കെതിരായ വിവാദ പരാമർശത്തിൽ മാപ്പ് പറഞ്ഞ് ഇടത് എംഎൽഎ എഎൻ ഷംസീർ. താൻ നടത്തിയ പ്രസംഗത്തിൽ ഡോക്ടർമാരെ അപമാനിക്കുന്ന തരത്തിലുള്ള പരാമർശങ്ങൾ അടങ്ങിയതായി ചിലർ ചൂണ്ടിക്കാട്ടി. തന്റെ തന്റെ ഉദ്ദേശ്യം അതല്ലായിരുന്നുവെന്നും ഷംസീർ പറഞ്ഞു. ഫേസ്ബുക്ക് വീഡിയോയിലൂടെയായിരുന്നു ഷംസീർ തന്റെ മണ്ടത്തരത്തിൽ ഖേദം പ്രകടിപ്പിച്ച് രംഗത്ത് വന്നത്.
നവംബർ ഒൻപതിന് കേരള മെഡിക്കൽ പ്രാക്ടീഷണേഴ്‌സ് ബില്ലുമായി ബന്ധപ്പെട്ട് നടത്തിയ പ്രസംഗത്തിൽ ഡോക്ടർമാരെ അപമാനിക്കുന്ന തരത്തിലുള്ള തെറ്റിദ്ധാരണകളുണ്ടാകുന്ന പരാമർശങ്ങൾ കടന്നു കൂടിയതായി ചിലർ പറഞ്ഞിരുന്നു. ഇതേ തുടർന്ന് നിയമസഭയിൽ തന്റെ പരാമർശം തിരുത്താൻ ആവശ്യപ്പെട്ട് കത്ത് നൽകി. എംബിബിഎസ് ബിരുദം നേടിയ ചിലർ കേരളത്തിന്റെ ചില കേന്ദ്രങ്ങളിൽ പിജി ഉണ്ടെന്ന വ്യാജേന ചികിത്സിക്കുന്നുണ്ട്. ഇതുമായി ബന്ധപ്പെട്ട് ചില കേസുകളും റിപ്പോർട്ട് ചെയ്തിട്ടുണ്ട്. ഇതേ തുടർന്നാണ് ബില്ലിലൂടെ ഇത് തടയണമെന്ന് തീരുമാനിച്ചത്.
എന്നാൽ പ്രസംഗത്തിനിടെ നാക്കുപിഴ പറ്റി. അത് എംബിബിഎസ് ഡോക്ടർമാർക്ക് വിഷമമുണ്ടാക്കിയെന്ന് അറിഞ്ഞതിൽ ദു:ഖമുണ്ടെന്നും ഷംസീർ വ്യക്തമാക്കി. എംബിബിഎസ് പഠിച്ചയാൾ എംബിബിഎസ് ചികിത്സ മാത്രമേ നൽകാൻ പാടുള്ളൂവെന്നാണ് ഷംസീർ നിയമസഭയിൽ പറഞ്ഞത്.
